Категорија: Uncategorized

Вести

Прва, историска победа за Мулти Есенс

РК МУЛТИ ЕСЕНС – РК ШАМПИОН   39-26 (20-11)
Сала: „Круме Кепески“ во Скопје. Судии: Адриана Здравковска и Сања Божиновска. Делегат: Митко Ѓоргиевски.
Мулти Есенс: Штаковски, Ерманоски, Грујевски 6, Д. Узунчев 5, Тричковски 2, Велков, Младеновски 1, Т. Узунчев 8, Митев 1, Проданов 2, Канг 2, Јорданов 2, Карасманакис 3, Костовски 4, Георгиевски, Иванов 3
Седмерци: 3/5 Исклучувања: 6 мин.
Шампион: Спирковски, Сотировски, Илиевски, Димовски, Велјановски 7, Сибиновски 7, Дебрешлиоски, Миловановиќ, Трајковски, Костов, Билбиловски 5, Петровски 1, Миновски 3, Богоевски 3, Огненовски, Ѓоргиевски
Седмерци: 3/4 Исклучувања: 8 мин. 

РК Мулти Есенс запиша победа што во клупската биографија ќе биде запишана како историска, затоа што е извојувана на првиот официјален натпревар од домашното првенство што клубот воопшто го одиграл. 

На дебито, гостин ни беше екипата на РК Шампион од Скопје. По вообичаената почетна израмнетост, брзо ја преземавме контролата и поведовме со три гола (6-3), а потоа и со четири и пет гола разлика (10-6, 11-6). Предноста продолжи да расте и до крајот на полувремето имавме плус девет гола разлика (20-11). 


Во вториот дел уште на почетокот поведовме со двоцифрена разлика и од тој момент, до крајот секогаш резултатот беше на плус 10. Гостите во неколку наврати во финишот се обидоа да се вратат на едноцифрена негатива, но финишот одново ни припадна нам и средбата ја добивме со 13 гола разлика (39-26).
Тодор Узунчев со осум гола беше нашиот најдобар стрелец, а Александар Грујевски постигна шест гола, а Димимитар Узунчев беше стрелец на пет погодоци. 

Вести

Втора победа, се враќаме со три бода од Куманово

10/09/2022

КУМАНОВО – АЛКАЛОИД  26-40 (10-19)
Сала: „Перо Наков“ во Куманово. Судии: Ѓоко Колевски и Сашо Кркачев. Делегат: Цане Куртовиќ. 
Куманово: Кимевски, Мрвовиќ 9, Димитров, Кузмановски, Петковски 3, Д. Цветковски 1, Бошковски, Тасевски, Миладиновски 1, Б. Цветковски, Постоловски 3, Колоски 1, Дамевски 5, Несторовски, Трајчевски 2, Михајловски
Седмерци: 2/5 Исклучувања: 14 мин.
Алкалоид: Галевски 1, Трајковски, Димевски 3, Маркоски, Стојков 8, Младеновиќ 2, Серафимов 4, Илиески 1, Стојковиќ 3, Ѓоргиев 3, Иваноски 1, Симоноски 1, Омерагиќ 1, Тодески, Кофилоски 5, Петковски 5
Седмерци: 7/8  Исклучувања: 14 мин.

РК Алкалоид ја запиша втората победа од исто толку одиграни натпревари во новата суперлигашка конкуренција. На гостински терен во Куманово, го совладавме тимот на МРК Куманово со 40-26 (19-10) и со шест освоени бода остануваме на врвот на табелата.

Нашиот тим имаше контрола врз играта и резултатот од почетокот на натпреварот. Игравме добра и подвижна одбрана, која ни овозможи голови од контра напад и од транзиција.
Голманот Иван Галевски беше на висина на задачата, а развојот на играта убаво го искористи и крилото Александар Стојков. Тој постигна пет од првите десет гола, а нашиот тим поведе со поголема разлика по 15 минути игра (10-6).

Во продолжнието на натпреварот ритамот што го наметна нашата екипа, ни овозможи постојано да ја зголемуваме разликата. По 26 минути игра за прв пат на натпреварот поведовме со 10 гола разлика (18-8). Резултатот на полувреме беше 19-10.

Во вториот дел уште во раната фаза зголемивме на 13 гола разлика (25-12). Се повеќе играчи се запишуваа на листата на стрелци и сите кои добија шанса ја користеа, но ритамот на натпреварот, најмногу им одговараше на крилните играчи, па така Кофилоски и Петковски се искачија на листата на стрелци со по пет гола.

До крајот на средбата нашиот тим имаше се под контрола и втор пат успеа да стигне до 40 постигнати гола. Конечниот резултат е 40-26.

Во следното коло, прв пат ќе играме на домашен терен, а гостин ќе биде екипата на ГРК Охрид.

Вести

РК Алкалоид со победа ја почна сезоната

03/09/2022

ПРИЛЕП – АЛКАЛОИД  30-43 (15-22)
Сала: Р. Р. Ричко во Прилеп. Судии: Методија и Михајло Илиевски. Делегат: Илија Цветкоски.
ПРИЛЕП: Стојкоски, Ангелески, Јордановски, Дамчевски, Бикоски 5, Вренцоски 1, Адамчески, Шокоски 8, Лозаноски 1, Чантурија 2, Павлов 1, Христоски, Гавашелишвили 6, Ѓоргиески 6
Седмерци: 2/3 Исклучувања: 14 мин.
АЛКАЛОИД: Трајкоски, Галевски, Маркоски 4, Стојков 2, Младеновиќ 3, Серафимов 8, Илиески 6, Стојковиќ 1, Митев 2, Ѓоргиев 4, Иваноски 1, Симоноски 3, Омерагиќ, Тодески 4, Кофилоски 1, Петковски 4
Седмерци: 2/2 Исклучувања: 10 мин.

РК Алкалоид со освоени три бода на гостински терен ја почна својата прва сезона во Супер лигата. Во првото коло, гостувавме кај екипата на РК Прилеп и запишавме победа од 43-30 (22-15). 
По израмнетиот почеток и резултат 4-4, нашата одбрана и транзицијата во играта ни овозможија уште во раната фаза на натпреварот, по 11 минути игра, да стигнеме до водство од четири гола (9-5). 

По ова мечот влезе во фаза во која се играше динамично и наизменично се постигнуваа голови, но водството не беше во ниту еден момент доведено во опасност. 
Дистанцата од 4-5 гола (10-5, 17-12, 20-15) остана до крајот на првото полувреме кое заврши со резултат 22-15. 
Во второто полувреме игравме уште покомпактно и по десет минути игра имавме најголемо водство од осум гола разлика (30-22). Надигрувањето продолжи и во 47 минута за прв пат на мечот разликата беше двоцифрена (35-25). Во финишот на натпреварот, дополнително ја зголемивме разликата и средбата заврши со конечен резултат 43-30. 


Сите ракометари заслужуваат пофалби за денешната средба, а голгетерски најмногу се истакна Мартин Серафимов кој постигна осум погодоци, Божидар Илиески постигна шест гола, а со по четири погодоци придонесоа Теодор Тодески и Игор Ѓоргиев. 

Во следното коло, одново ќе играме на гостински терен, кај екипата на МРК Куманово.

Вести

РК Алкалоид со донација на компјутерска опрема за ОУ „Круме Кепески“ во Скопје

29/08/2022

Со донација на компјутерска опрема за Основното училиште „Круме Кепески“ во Скопје, РК Алкалоид ја истакна својата заложба за придонес во активностите за општествена одговорност за подобрување на условите за правилен развој и за квалитетно образование на младите.

РК Алкалоид е формиран со главна цел  промоција на спортот, поддршка на младите ракометни таленти и развој во врвни играчи. Освен стремежот за овозможување квалитетен и напреден тренажен процес на младите таленти и за нивно развивање во врвни ракометари, клубот во своето дејствување се залага и за здрав начин на живот на младите и за квалитетно образование.

Изминатата година клубот им посвети посебно внимание на најмладите, преку отворање свои ракометни школи во Скопје и во неколку градови во Македонија, кои во првата сезона броеја повеќе од 500 деца. Една од школите на клубот своите тренинзи ги реализираше токму во спортската сала на Основното училиште „Круме Кепески“ во Кисела Вода, од каде што произлезе идејата за донација на компјутерска опрема, со која ќе се придонесе за подобрување и за унапредување на условите во образованието на учениците и на младите.

Kомпјутерската опрема се состои од: 10 десктоп-компјутери во комплет со монитор, тастатура, глувче, слушалки и со камера; 3 лаптопи, 4 печатачи, 2 скенера, 6 монитори, 2 ранци и 15 торби. Во согласност со потребите на училиштето, опремата е наменета за опремување на кабинетот по Информатика за учениците во училиштето, со што ќе се овозможи квалитетно реализирање на секојдневните задачи и унапредување на образовните активности во делот на информатичкото образование.

Горан Минов, претседател на РК Алкалоид, му ја додели донацијата на Орце Ѓорѓиевски, градоначалник на Општина Кисела Вода.

Во односите со заедницата не е доволно само да бидеме добар сосед, туку треба да бидеме и добар партнер. Преку поддршка со разни проекти и преку голем број активности, клубот и натаму ќе се труди да придонесе за подобрување на постојните или за иницирање нови начини за враќање кон нашата заедница во делот на спортот, здравиот живот, како и во другите области за правилен развој на најмладите во општеството.

Вести

Кирил Лазаров е нов тренер на нашиот тим

Го официјализиравме поставувањето на Кирил Лазаров за тренер на нашата екипа и ги промовиравме осумте нови ракометари кои летово се приклучија во нашето ракометно семејство.

На прес-конференцијата одржана во Хотелот „DoubleTree by Hilton“ на 23 август, претседателот на клубот Горан Минов пред медиумите ги претстави Кирил Лазаров и новите играчи и зборуваше за целите на клубот во новата сезона.

За своите импресии, очекувања и планови за следната сезона зборуваа и Кирил Лазаров, капитенот Игор Ѓоргиев и репрезентативното засилување Никола Маркоски.

Погледнете ги видеото и фотогалеријата од настанот.

Вести

РК Алкалоид ќе настапи на „Трофеј Нови Београд“

Продолжуваат подготовките на нашиот тим за постигнување на целосна натпреварувачка форма за натпреварите во Суперлигата во претстојната сезона. По настапот на турнирот во Струга, следен предизвик за нашиот сениорски тим ќе биде турнирот што ќе се одржи во Белград, Србија.

Ќе учествуваме на вториот „Трофеј Нови Београд“, кој ќе се игра во СЦ Вождовац на Бањица, а годинава ќе учествуваат екипите на РК Партизан Белград, РК Динамо Панчево и на израелскиот клуб РК Хапоел Ашдод.

Турнирот ќе се игра според системот раунд робин, односно секоја екипа ќе игра против секоја.

Во првото коло на 25 август ќе играме со екипата на РК Хапоел, следниот ден ќе се сретнеме со екипата на РК Динамо Панчево, а на 28 август, на последниот ден од турнирот, ќе играме со РК Партизан.

РАСПОРЕД НА НАТПРЕВАРИТЕ НА „ТРОФЕЈ НОВИ БЕОГРАД“

25.8.2022 (17:15), РК Алкалоид – РК Хапоел Ашдод

26.8.2022 (19:30), РК Алкалоид – РК Динамо Панчево

28.8.2022 (17:30), РК Партизан – РК Алкалоид