РК Мулти Есенс е новиот шампион на Првата лига и директно се пласираше во Суперлигата. Сезонава, со остварени 23 победи и само еден пораз, РК Мулти Есенс го освои првото место на конечната табела со освоени 46 бода, еден повеќе од РК Младост 1977 Богданци, која сега ќе игра бараж против претпоследниот тим од Суперлигата, екипата на РК Струга. Екипата на РК Драчево Јуниор на крајот ја освои третата позиција.

Во решавачкиот натпревар, последен сезонава што се одигра во Автокоманда, РК Мулти Есенс попладнево го победи тимот на РК Драчево Јуниор. Дерби натпревар беше решен уште во првото полувреме. По изедначеното резултатско отворање до 5-5, следеше серија на Мулти Есенс и во последната минута од полувремето стигна до предност од десет гола (17-7). На пауза беше 17-8, а односот на силите не се промени ниту во второто полувреме, па конечниот резултат гласеше 39-25 во корист на новиот суперлигаш.

РК Алкалоид е нов пионерски шампион на Македонија, откако во финалето на завршниот Ф4-турнир во салата „Автокоманда“ славеше против ГРК Охрид со убедливи 28:20.

До шампионскиот трофеј тимот на РК Алкалоид беше предводен од Иван Великов, кој постигна осум гола во финалето, додека Петар Митев додаде уште шест погодоци. Претходно, во полуфиналето РК Алкалоид го елиминира РК Мулти Есенс (24:20), а ГРК Охрид беше подобар од РК Еурофарм Пелистер 2 (14:13).

Во „малото финале“, односно мечот за трето место, РК Мулти Есенс го совлада РК Еурофарм Пелистер 2 со резултат 26:22.

По завршувањето на турнирот, индивидуалните признанија исто така заминаа во редовите на РК Алкалоид. За најдобар голман беше избран Мартин Пандиловски, додека признанието за МВП на турнирот му припадна на Петар Митев. Во идеалниот „ол-стар“ тим од нашиот состав се најдоа Мартин Пандиловски како голман, Иван Великов на позицијата десен бек и Владимир Николовски како пивот.

Покрај нив, место во идеалната постава добија и Христијан Ангеловски, Горјан Петрушевски и Емануел Вумвулакис од РК Мулти Есенс.

ГРК ТИКВЕШ – РК АЛКАЛОИД 23-30 (11-12)
Сала: „Јасмин“ во Кавадарци. Судии: Глигор Ќаев и Спаско Ќаев. Делегат: Васил Чавдаров
ГРК ТИКВЕШ: Панов, Јовевски 2, Стојановски 6, Цејовиќ 4, Лазороски, Велков, Печуруца, Димовски, Лазов 2, Ѓоргиев, Коцев 2, Симиќ 1, Ангелов, Мијушковиќ 6, Бакев
Седмерци: 5/7 Исклучувања: 4 мин.
РК АЛКАЛОИД: Кизиќ, Џонов 4, Тордарсон 6, Маркоски, Карасманакис 1, Ѓоргиев 4, Велковски 2, Симоновски 1, Ивановски, Костески 1, Петковски 2, Борзаш 7, Аларов, Ѓорговски 2
Седмерци: 2/4 Исклучувања: 2 мин.

РК Алкалоид беше гостин во Кавадарци и го совлада тимот на ГРК Тиквеш во последниот натпревар од Суперлигата пред паузата за настап на репрезентацијата во бараж натпреварите за пласман на СП 2027. До крајот на првенството остануваат уште две кола, а близината на крајот на сезоната има влијание и остава траг во играта на екипите.

Домашниот состав беше мотивиран за игра против РК Алкалоид и во првите 10 минути од натпреварот имаше и мала резултатска предност. Но, брзо ја презема контролата екипата на РК Алкалоид, во 21 минута водеше со три гола разлика (11-8). На полувреме разликата беше само еден гол (12-11), но РК Алкалоид беше далеку подобар противник во продолжението.

По воведната резултатска израмнетост, РК Алкалоид почна да се одлепува од противникот, па така во 40 минута беше 20-16, предност што до крајот на натпреварот беше зголемена на конечните 30-23. Урош Борзаш беше најефикасен на теренот со седум постигнати голови, Тордарсон постигна шест, а шанса да брани доби голманот Ѓорѓи Николовски и запиша девет одбрани.

РК АЛКАЛОИД – ГРК ОХРИД 26-27 (12-17)
Сала: Автокоманда“ во Скопје. Судии: Силвана Карбеска и Марија Илиева. Делегати: Марјан Начевски и Лери Мирчевски
РК АЛКАЛОИД: Кизиќ, Галевски, Џонов 1, Тордарсон 3, Маркоски 1, Карасманакис, Стојковиќ 3, М. Митев 1, Ѓоргиев 2, Велковски 2, Ненад Костески 4, Петковски, Д. Митев 5, Борзаш 4, Аларов, Николов
Седмерци: 3/3 Исклучувања: 4 мин.
ГРК ОХРИД: Пилиповиќ, Блажески, Ојлески 2, Јагуриноски 2, Иванковиќ 4, Кукуловски 2, Јасухира 7, Ристески, Тасески 1, Моралес, Савревски 1, Љапис 1, Бојаниќ, Ѓукиќ 3, Ќосевски 2, Прибетиќ 2
Седмерци: 3/3 Исклучувања: 6 мин.

Во дерби натпревар од македонската Суперлига, екипата на РК Алкалоид беше домаќин на тимот на ГРК Охрид.
Ова беше дуел на шампионот на ЕХФ Куп – РК Алкалоид и актуелниот финалист на ЕХФ Куп – ГРК Охрид. Пред почетокот на мечот, РК Алкалоид им го честиташе пласманот во финалето на ЕХФ Куп на ракометарите на ГРК Охрид и им посака победа и во финалето.

Екипата на ГРК Охрид запиша минимална победа на овој натпревар, меч на кој по неколку неделна пауза во тимот на РК Алкалоид од повреда се вратија репрезентативците Марко Митев и Игор Ѓоргиев. Играа со ограничена минутажа и добро ги поднесоа оптоварувањето во текот на играта.

Резултатски РК Алкалоид имаше добри воведни минути во кои стигна до водство од три гола разлика (7-4) и пропушти шанса да го зголеми тоа водство. Таа ситуација се претвори во импулс за гостинскиот состав кој до крајот на полувремето успеа да направи пресврт и да ги казни сите грешки на РК Алкалоид по што на полувреме резултатот беше 12-17.

Пофокусирано играше РК Алкалоид во второто полувреме, анулираше брзо два гола од негативата и во неколку наврати имаше шанса и дополнително да се доближи, но технички грешки или промашување во клучните моменти секогаш го враќаше тимот чекор назад.
Во финишот на натпреварот РК Алкалоид намали на само еден гол разлика, но немаше доволно време за поголема драма и гостинскиот состав успеа да ја сочува топката во последните секунди и да ги освои бодовите.

РК ВАРДАР 1961 – РК АЛКАЛОИД 30-27 (17-14)
Сала: „Јане Сандански“ во Скопје. Судии: Ненад Николовски и Исмаил Металари од Скопје. Делегати: Душко Камишевски и Марјан Огњановски.
РК ВАРДАР 1961: Валах (14 одб), Богдановски, Гогов, Стојановски 3, Воркапиќ 5, Боно, Георгиевски 1, Митровиќ 3, Танкоски, Лазаревски 1, Марчињак, Тузолана 2, Атанасовски, Силва 4, Малус 8, Јанковски 3
Седмерци: 2/4 Исклучувања: 6 мин.
РК АЛКАЛОИД: Кизиќ (3 одб), Галевски (6 одб), Џонов 1, Тордарсон 2, Маркоски, Карасманакис 2, Стојковиќ 1, Велковски 1, Ивановски, Костески 6, Петковски 2, Д. Митев 2, Борзаш 3, Аларов 2, Николов 3, Ѓорговски 2
Седмерци: 2/4 Исклучувања: 6 мин.

РК Алкалоид не успеа да направи изненадување на гостувањето кај РК Вардар 1961 на натпревар од 28 суперлигашко коло и бодовите останаа за противникот. РК Вардар за кого овој меч беше посебен затоа што беше во централен настан во прослава на голем јубилеј, 65 години од постоење запиша победа од 30-27, на натпревар без преголема тензија и интензитет.

РК Алкалоид беше за нијанса подобар во воведните 10 минути од натпреварот. Домашниот состав израмни и премина во тесно водство, по што натпреварот влезе во фаза во која се одржуваше дистанца од два до три гола.
РК Алкалоид во последната третина од полувремето намали на еден гол разлика (14-15), но невнимание во самиот финиш доведе до конечни 17-14 по 30 минути игра.

За одбележување во екипата на РК Алкалоид е дека на овој натпревар, по пауза од речиси пет месеци поради повреда на раката во игра се врати пикерот Валентин Карасманакис.

Во второто полувреме не се променија битно работите. Противникот успеа да зголеми на пет гола разлика и да ја одржува до последните 10 минути. РК Алкалоид намали на минус три гола и имаше неколку неискористени шанси за да го направи натпреварот драматичен. Реализацијата не беше најсилната страна во последните минути и натпреварот заврши со резултат 30-27. Во следното коло, РК Алкалоид на домашен терен ќе го пречека тимот на ГРК Охрид.

РК АЛКАЛОИД – РК ВАРДАР 1961 28-33 (16-18)
Сала: „Парк“ во Струмица. Судии: Ненад Николовски и Исмаил Металари. Делегати: Лери Мирчески и Бобан Мајнов
РК АЛКАЛОИД: Галевски, Кизиќ, Џонов 1, Тордарсон 2, Маркоски 1, Стојковиќ 2, Велковски, Симоноски, Ивановски, Ненад Костески 4, Петковски 1, Д. Митев 6, Борзаш 4, Аларов, Николов 4, Ѓорговски 3
Седмерци: 2/3 Исклучувања: 4 мин.
РК ВАРДАР 1961: Валах, Гогов, Стојановски, Воркапиќ 5, Боно 1, Георгиевски 4, Митровиќ, Танкоски 1, Лазаревски, Марчињак 1, Тузолана 6, Хориха 3, Атанасовски, Да Силва 2, Малус 9, Јанковски 1
Седмерци: 2/3 Исклучувања: 10 мин.

РК Алкалоид го заврши настапот во Куп на Македонија на Ф4 турнирот што се одржува во Струмица. Во полуфиналето на турнирот, РК Алкалоид играше против екипата на РК Вардар 1961, а конечниот резултат е 28-33 (16-18).

Во РК Алкалоид, покрај неколкуте отсуства поради повреди, меѓу нив и на Игор Ѓоргиев и Никола Костески, на денешниот меч не можеше да настапи уште ден член на стартната постава, а тоа Марко Митев кој се повреди на последното дерби со Е. Пелистер во Автокоманда пред три дена.

И покрај тоа РК Алкалоид почна подобро, поведе со 4-1 и 5-2, пред противникот да влезе во подобар ритам и да израмни на 5-5.
Потоа беше релативно израмнето до крајот на првиот дел кој заврши со предност од два гола за екипата на РК Вардар (18-16).
Во вториот дел до поголем израз дојде пократкиот тимски ростер на РК Алкалоид и противникот тоа го искористи за да направи поголема, односно решавачка предност.
Во финишот на натпреварот и двата тренера им дадоа минутажа и на играчите со помала минутажа кои го формираа и конечниот резултат.