Почитувани медиуми,

Отворен е процесот за акредитирање на медиумите и на медиумските работници за натпреварот од првото коло во групата Ф на Европската лига на EHF меѓу екипите на РК Алкалоид и на РК Војводина, кој ќе се игра на 17 октомври (вторник) од 20:45 часот во СЦ „Јане Сандански“ – Скопје.

Новинарите од печатените медиуми и од порталите, како и фотографите треба да ги испратат своите барања најдоцна три работни дена пред почетокот на натпреварот. Барањата за акредитации треба да ги испратат на следнава адреса: [email protected]

Тeлевизиите, веб-телевизиите, поткастите и радијата/веб-радијата мора да аплицираат директно во EHF за добивање акредитација за следење на натпреварот. Барањата за акредитации треба се реализираат преку онлајн-платформата за акредитирање на EHF: https://accreditation.ehf.eu.

Акредитациите ќе бидат поделени на прес-конференцијата за најава на мечот на 16.10.2023 г., за која ќе бидете навремено информирани.

РК АЛКАЛОИД – РК СТРУГА 38-18 (13-13)

Сала: „Автокоманда“ во Скопје. Судии: Михајло Илиевски и Методија Илиевски. Контролор: Камер Металари

РК АЛКАЛОИД: Трајковски 1, Галевски, Џонов 5, Маркоски, Младеновиќ 2, Серафимов 4, Стојчевиќ, Стојковиќ, М. Митев 2, Ѓоргиев 2, Велковски 2, Омерагиќ 3, Бинго 4, Кофилоски 5, Петковски 7, Д. Митев 1

Седмерци:2/2 Исклучувања: 6 мин.

РК СТРУГА: Тутенкоски, Тренчевски 5, Мулиќ, Савевски 1, Младеновски 2, Јанкуловски 4, Симоноски, Велјаноски, Ф. Мечкароски 1, Костоски, Бошњак 5, Марковски, М. Мечкароски, Гускароски, Рикановиќ

Седмерци: 5/6 Исклучувања: 6 мин.

Нашиот тим тргна добро и имаше контрола на играта на стартот. Иван Галевски забележа две интервенции, се дојде до серија од 4-0 и така избраниците на Кирил Лазаров од 1-2, дојдоа до предност од 5-2. Струга меѓу стативите го имаше расположениот Рикановиќ, кој фати пет топки во нападите на нашите ракометари и така тимот од градот крај езерото беше во егал. Беше 9-9, 10-10, па 13-13 на паузата, а во воведните минути од второто полувреме се направи разликата.

Вториот дел беше далеку спротивен од првиот за РК Алкалоид во играта. Во првото полувреме се играше доста тешко, додека стартот на второто полувреме донесе еден нов Алкалоид на теренот. Лазаров реши да ги менува и голманите, а Благојче Трајковски, кој денес слави роденден, влезе во ритам и фати четири топки. Така, РК Алкалоид воден во нападот од Џонов, Бинго и Петковски, замина на највисоки 21-15 во 40. минута од натпреварот во „Автокоманда“. Во продолжението од мечот беше полесно да се игра, разликата константно растеше и така на крајот се запиша посакуваната победа, двоцифрена, петта оваа сезона во Суперлигата.

Колку за илустрација на различните полувремиња, во првиот дел РК Алкалоид постигна 13 и прими 13 гола, а во второто полувреме постигна 25, а прими само пет гола. За издвојување денес е и роденденскиот погодок на Благојче Трајкоски кој ја зачини неговата одлична партија со погодок од гол на гол.

РК АЕРОДРОМ – РК АЛКАЛОИД 30-44 (16-21)
Сала: „Автокоманда“ во Скопје. Судии: Глигор Ќаев и Спаско Ќаев. Контролор: Зоран Кимовски
РК АЕРОДРОМ: Богдановски, Пајкоски 2, Мелоски 1, Митревски 2, Костов 7, Олтовски, Стојановски 1, Трифуновски 2, Трајчевски 1, Бошковски 6, Василев, Анакиевски 4, Анѓелковски 2, Грујевски, Димевски 2, Кизиќ
Седмерци: 5/10 Исклучувања: 10 мин.
РК АЛКАЛОИД: Трајковски 1, Галевски, Џонов 10, Маркоски, Младеновиќ, Стојковиќ 3, М. Митев 2, Ѓоргиев 2, Велковски 1, Омерагиќ 2, Кофилоски 5, Петковски 8, Д. Митев 7, Савревски 3
Седмерци:7/7 Исклучувања: 6 мин.

РК Алкалоид ја запиша и четвртата победа од исто толку суперлигашки натпревари во новата сезона, вечерва, како гостин во својата „Автокоманда“, против екипата на РК Аеродром.
Новиот суперлигаш амбициозно го почна натпреварот и имаше водство во првата четвртина од средбата или успеваше да израмни. Долго време се мечот беше во егал во првото полувреме, се до резултат 14-14, а потоа нашиот тим влезе во ритам и со серија од 7-2 на полувреме замина со предност од 21-16.

Вториот дел беше сосема поинаква приказна. РК Алкалоид доминираше во сите сегменти на играта и набрзо стигна до двоцифрена предност 28-18, а потоа и ја зголемуваше до највисоките плус 15 (33-18) и без проблеми стигна до нов триумф.

РК ПРОЛЕТ 62 – РК МУЛТИ ЕСЕНС 32-27 (17-10)

Сала: „Македонско сонце“ во Скопје. Судии: Ѓорѓи Начевски и Славе Николов. Контролор: Марјан Начевски
РК ПРОЛЕТ 62: Петковски, Николовски 1, Тотиќ 1, Пецаковски, Василевски 5, Кочаров, Додевски 4, Димов 3, Андоноски 2, Мајнов, Димковски 2, Стојановски 3, Михаљевиќ, Палевски 6, Спасовски, Арсеновски 5
Седмерци: 2/2 Исклучувања: 14 мин.
РК МУЛТИ ЕСЕНС: Ерманоски, Димевски 1, Костовски, Илиески 9, Петковски, Д. Узунчев 2, Петрески, Трајчев, Трајковски, Ѓоргиевски, Василевски, Тодески 1, Димовски, Трајковски, Јорданов 12, Карасманакис 2
Седмерци: 7/7 Исклучувања: 10 мин.

Нашиот млад состав, РК Мулти Есенс, имаше неуспешна акција за освојување на бодовите од дуелот со Т. Пролет 62 на гостински терен.
РК Мулти Есенс беше подобар од Т. Пролет во текот на подготовките, на турнирот во Прилеп, но вечерва домашниот состав имаше подобро отворање на натпреварот, поведе со 5-2, 8-3… и рано стигна до предност која го одреди текот на натпреварот. На полувреме беше 17-10 за домашниот состав.
Во вториот дел, домашниот состав рутински ја одржа предноста и ги освои бодовите.
Шансата за освојување на бодови, РК Мулти Есенс ќе се обиде да ја реализира во следното коло, кога во „Автокоманда“ на гости ќе дојде екипата на РК Прилеп.

РК МУЛТИ ЕСЕНС – РК БУТЕЛ СКОПЈЕ 28-33 (16-16)
Сала: „Автокоманда“ во Скопје. Судии: Методија Илиевски и Михајло Илиески 3. Делегат: Ацо Николовски
РК МУЛТИ ЕСЕНС: Ерманоски, Василевски, Димевски 1, Костовски 2, Илиески, Петковски, Д. Узунчев 8, Петрески 1, Трајчев, Омерагиќ, Трајковски, Ѓорѓиевски, Тодески 1, Димовски 5, Јорданов 4, Карасманакис 3
Седмерци: 1/2 Исклучувања: 14 мин.
РК БУТЕЛ СКОПЈЕ: Стојаноски, Субашевски 3, Андревски, Пејковски, Стојановски, Георгиевски 6, Николов 6, Крстевски 1, Иваниќ 6, Спасовски 4, Бошковски 1, Блажевски 1, Јефиќ 4, Михајловиќ, Цветковски, Давитковски 1
Седмерци: 3/5 Исклучувања: 6 мин

РК Мулти Есенс не успеа да освои бодови на вечерашниот трет суперлигашки настап, на кој гостин во „Автокоманда“ беше екипата на РК Бутел Скопје.
Нашиот млад тим имаше добро отворање на натпреварот и одлични 20-тина минути во првиот дел, но потоа работите тргнаа во спротивен правец.

РК Мулти Есенс по воведните минути во кои се играше гол за гол, успеа со серија од 4-0, за поведе со 10-7. Потоа постојано имаше водство кое максимално изнесуваше 15-10.
Хендикеп за нашиот состав беше повредата на левиот бек Теодор Тодески кој беше фаулиран додека беше во скок и изместен од рамнотежа по што незгодно падна и за него натпреварот беше завршен.

Гостите во игра се вратија по едно од многуте исклучувања во тимот на РК Мулти Есенс и од 10-15 на полувреме стигнаа до 16-16.
Поголемото искуство акумулирано во гостинскиот тим до израз дојде во второто полувреме во кое резултатски клучен период беше од 20-21 следеше мини серија за 21-25 по што одново искуството решаваше за развојот на настаните до конечните 28-33.

РК АЛКАЛОИД – РК ЕУРОФАРМ ПЕЛИСТЕР 2 42-29 (23-15)
Сала: „Автокоманда“ во Скопје. Судии: Виктор Начевски и Даниело Божиновски. Контролор: Марјан Огњановски

РК АЛКАЛОИД: Трајкоски, Галевски, Џонов 7, Маркоски 2, Младеновиќ 1, Серафимов 1, М. Митев 7, Ѓоргиев 5, Велковски, Омерагиќ 1, Кофилоски 3, Петковски 6, Д. Митев 3, Савревски 6
Седмерци: 0/1 Исклучувања: 2 мин.

РК ЕУРОФАРМ ПЕЛИСТЕР 2: Штаковски, Маркоски 6, Талевски 2, Ристевски, Митревски 4, Мирчески 2, Младенов, Трпчевски 5, Блажевски, Димитровски 2, Калајџиески 4, Пецаковски, Ивановски 2, Белистојановски 1, Мијушковиќ
Седмерци: 1/1 Исклучувања: 6 мин.

РК Алкалоид ја запиша својата трета победа од исто толку одиграни суперлигашки натпревари во новата сезона. Денеска гостин во „Автокоманда“ беше екипата на РК Еурофарм Пелистер 2, а средбата заврши со победа на сино-белите од 13 гола разлика (42-29).

Допадлив, убав, брз ракомет демонстрираа и двата тима, а во таа игра подобро се снајде нашиот тим. Одбраната успешно се носеше со битолските ракометари и уште од почетокот на натпреварот контролата ја презема РК Алкалоид.
Тренерот на гостинскиот тим, Михаил Петровски се обиде со ран тајм аут, уште при првото резултатско одвојување на 7-4 да спречи Алкалоид да премине во покомотно водство, но тоа имаше само краткотраен ефект.
Битолчани одржуваа тесна негатива до резултат 10-8, а потоа Алкалоид ја зголеми предноста на плус четири (13-19), потоа беше и плус шест (16-10), а во последната минута напаѓаше и за плус десет при резултат 23-14. Но, тој напад не беше реализиран, па во последниот во првиот дел, гостите од седмерец намалија на 15-23.

Марко Митев со шест, Александар Петковски со пет и Иван Џонов со четири погодоци беа најдобрите стрелци РК за Алкалоид во првото полувреме.

РК Алкалоид во второто полувреме во еден момент поведе со плус десет гола (26-16), но гостинскиот состав успеа да остане во игра и во следниот период се држеше под двоцифрената граница. Во 44 минута одново беше плус десет (31-21), а потоа поведе и со 11 гола пред гостинскиот тренер одново да побара минута одмор.
Во последните 10 минути Алкалоид влезе со плус 11 гола и мирно го приведе натпреварот до крајот, а и најмладиот во нашиот состав, Дамјан Митев имаше неколку атрактивни потези наградени со аплауз од трибините.

Во следното коло, РК Алкалоид на гостински терен ќе игра со екипата на РК Аеродром.