Во својата втора европска сезона РК Алкалоид ќе ја претставува Македонија во европскиот ЕХФ Куп, натпреварување што се игра по систем на елиминации, а стартува со 84 екипи кои денеска беа поделени во две кола и ги добија противниците за своите први елиминациски битки.

РК Алкалоид како најдобро рангирана македонска екипа од Македонија во ова натпреварување, почнува од второто коло, а во денешната ждрепка беше во улога на носител.
Првиот противник на РК Алкалоид во новата европска сезона ќе биде екипата на Драгунас Клаипеда од Литванија.
Драгунас (Змејови) е вториот најуспешен литвански клуб од осамостојувањето. Овој клуб во 2010 година ја прекина доминацијата на Гранитас Каунас кој освои 17 шампионски титули за 19 години. Шампионската ера на Драгунас траеше сѐ до првенството 2020 година кое беше прекинато поради Ковид. За тој период од 10 сезони, освоија девет шампионски титули.
Во 2021 на сцената се појави екипата на Швиеса и таа е литвански првак во последните три сезони. Во последната одиграна, пак, во финалето со 3-1 беа подобри токму од Драгунас.
Во клупската историја, Драгунас има освоено шампионски пехар и од Балтичката лига (2021). Во моментов тројца ракометари на Драгунас се на скратениот список на репрезентативци на Литванија. Четири позиции им се пополнети со странски ракометари. Голман, пивот и два леви бека, сите од Украина.

Натпреварите од второто коло во ЕХФ Куп ќе се играат во периодот од 19/20 октомври и 26/27 октомври возвратните натпревари. РК Алкалоид на првиот меч ќе биде домаќин во Скопје.

Ракометарите, стручните тимови и раководството на РК Алкалоид го одбележаа крајот на овогодинешната сезона, трета во историјата на клубот во која се сретнаа и успешно се носеа со многу нови предизвици меѓу кои е и дебитантскиот настап во Европската лига на ЕХФ, големите дерби мечеви во суперлигашкиот плејоф, историскиот настап и прв пехар во Куп на Македонија, шампионските пехари во пионерска, кадетска и младинска конкуренција и сето тоа проткаено со успешниот настап и големата одговорност што ја носат нашите ракометари со сениорската репрезентација, но и во помладите репрезентации.

Прес конференција и коктел дружење беше организирано по повод крајот на сезоната во присуство на нашите ракометари. Пред медиумите зборуваа претседателот на клубот Горан Минов, тренерот Кирил Лазаров и капитенот Игор Ѓорѓиев.

Кратка ретроспектива на сезоната со акцент на остварените резултати даде претседателот на клубот Горан Минов.

„Завршивме сезона која беше посебна за нас за многу работи, затоа што имавме многу нови предизвици. Се соочивме со нови моменти, како настап во Европа, кој настрана спортскиот и резултатскиот дел, бараше од нас и друг пристап којшто е организациски. Нашата сениорска екипа успешно се претстави во Европската лига на ЕХФ каде игравме со реномирани противници и ги освоивме првите бодови. Успешно и на високо ниво одигравме три европски средби и го положивме тој организациски дел со голема оценка, што за нас беше голем испит. На домашната сцена изборивме место во Европа, а посебна сатисфакција е освоениот Куп на Македонија. Посебно не радуваат успесите на младинските категории, во кои станавме прваци во пионерска, кадетска и младинска категорија. Со макотрпна, но стратегиски успешна работа, изградивме систем во кој сите се вклопија. Успеавме на ракометарите да им вградиме победнички менталитет, тоа ни донесе и успех. Нашата мисија е да дадеме идни македонски репрезентативци кои ќе ја радуваат Македонија во спортот број еден за нас. Сакам да изразам особена благодарност до Алкалоид АД Скопје и Живко Мукаетов, кој како главен покровител ни ги овозможи овие врвни услови за работа. Исто така, голема благодарност до стручниот штаб на чело со Кирил Лазаров како и ракометарите кои максимално се вложија оваа сезона да биде за нас најдобрата и најуспешна до сега. Благодарност до колегите, медиумите и навивачите кои ни беа голема поддршка“, изјави Горан Минов.

Тренерот на екипата Кирил Лазаров зборуваше за предизвиците низ кои минуваше екипата сезонава и ја најави следната сезона во која клубот ќе се стреми за чекор напред и во домашниот шампионат и на eвропската сцена.

„Клубот е формиран пред три години, но ние го одбравме потешкиот, но знам дека е вистинскиот пат, иако се соочуваме со многу препреки. Го одбравме македонскиот пат, работиме добро и за клубот, за државата, за македонскиот спорт и македонскиот ракомет. Се надевам дека и во иднина ќе продолжиме по тој пат иако воопшто нема да биде лесно, затоа што македонската лига од година во година расте. Оваа сезона имавме доминантно претставување во првиот дел, завршивме со 14 победи на 14 меча, а потоа успеавме да освоивме и титула во Купот во кој во неполни 72 часа, чесно и посветено, ги победивме двата најконкурентни тимови. Тоа е голем успех за нас и голема сатисфакција за во иднина дека треба да продолжиме по тој пат и да веруваме, но истовремено да знаеме дека патот ќе биде уште потежок. Завршивме на третото место во плејофот, излеговме во Европа, за нас Европскиот куп на ЕХФ, е вистинскиот и се надевам дека таму ќе бидеме повеќе конкурентни и ќе минеме повеќе кола. Но, морам да истакнам дека посебно ми е драго што успеавме да направиме успеси во младинските категории. во иднина апелирам до раководството на клубот уште повеќе да се вложува во овие категории затоа што тоа е иднината на македонскиот ракомет. Апел до другите клубови да не гледаат конкуренти во нас, туку да инвестираат во млади играчи, затоа што само така може ракометот да го задржи приматот спорт број еден во Македонија.“ , изјави Кирил Лазаров.

Капитенот Игор Ѓорѓиев изјави дека е горд што крај себе има соиграчи-професионалци и на сите им честита за успехот во сезоната на која се спушта завесата.

„Завршуваме една успешна сезона на РК Алкалоид. Нашиот тим сезонава го донесе првиот трофеј во витрините на клубот, тоа е Купот на Македонија, успех на кој посебно сме горди. Игравме и во Европската лига на ЕХФ каде имавме шест квалитетни натпревари со кои стекнавме големо искуство и за нас како млада екипа ќе ни служи многу за наредниот период. Следната сезона повторно ќе играме во Европа, јас како капитен можам да кажам дека сме задоволни од покажаното и нашето издание. Наша главна цел е да играме добар, пред се европски ракомет и со тоа да ја радуваме нашата Македонија. Благодарност до условите кои ни ги овозможи Алкалоид, благодарност до соиграчите кои беа големи професионалци и големи работници. На крајот најмногу сакам да се заблагодарам на нашата публика која неуморно не бодреше цела сезона, со таква поддршка ветуваме борба, залагање и многу поголеми успеси“, изјави Игор Ѓорѓиев.

По обраќањето на присутните, РК Алкалоид им додели подароци и се поздрави со двајца ракометари. Левото крило Дарио Кофилоски и голманот Виктор Василевски си заминуваат од нашиот колектив. Клубот им се заблагодарува за досегашниот придонес, лојалност и посветеност и им посакува успех во натамошната кариера.

РК Алкалоид предвидено е да ги почне подготовките за новата сезона на 25 јули.

Зад нас е уште една успешна сезона, трета по ред и резултатски најуспешна. Сезона во која се докажавме на сите полиња, прв пат и надвор од границите и го направивме посакуваниот чекор во стратегиската определба да растеме и напредуваме без да прескокнуваме скалила и да бараме полесен и пократок пат кон успехот.

Во сезоната што измина освоивме победнички пехари во сите возрасни категории, го имавме својот прв настап во Европа, во силната ЕХФ Европска лига и се радувавме на првиот освоен бод и на првата европска победа.

Првиот дел од сезоната го завршивме со максимални 14 победи и доминантно го освоивме првото место пред Плејоф разигрувањето. Во овој дел од сезоната настапивме и во ЕХФ Европската лига каде ги освоивме и првите бодови од дуелите со реномираната екипа со долга традиција од Шпанија, екипата на БМ Логроњо Ла Риоха.

Во Плејоф шампионатот на Македонија го освоивме третото место на конечната табела. Позиција од која одново следната сезона ќе играме во Европа, овој пат во ЕХФ Куп.

Најголемата сатисфакција и награда за количеството на вложен труд од сите структури во клубот, истрајноста и исправноста на определбата да се натпреваруваме со домашни ракометари ја добивме на крајот на сезоната.
Прво преку репрезентативниот настап на нашите ракометари кои покажаа дека има голем напредок и изнесоа голем товар во националниот тим кој обезбеди пласман на уште едно Светско првенство.
Потоа потврда за квалитетот добивме и на клупско ниво, во Куп на Македонија. Таму со победите над РК Вардар 1961 во полуфиналето и победата над РК Еурофарм Пелистер во финалето стигнавме до првиот пехар во сениорска конкуренција.

Голема сатисфакција добивме и од вложувањето и работењето со младите категории на играчи. По само три сезони, остваривме комплетна доминација во младинските категории.
Пионерите на РК Алкалоид се шампиони на Македонија, кадетите на РК Алкалоид се прваци на Македонија и младинскиот тим на РК Мулти Есенс е нов државен првак на Македонија.

Успеавме на цела плејада на млади ракометари да им всадиме професионални работни навики и победнички, шампионски ген и да ги внесеме во системот што се гради и надградува. Очекуваме нивниот пат да биде поплочен со успеси и на клупско и на репрезентативно ниво претставувајќи ја Македонија на големата сцена, почнувајќи од летово и настапите на ЕХФ Еуро во кадетска и јуниорска конкуренција.

Заокружуваме успешна сезона и веќе почнуваме со организација и надградба за следната година во која нѐ очекуваат низ нови предизвици. Ќе бидеме спремни за сите, ќе продолжиме по зацртаниот пат и ќе растеме од година во година.

Посебно им се заблагодаруваме на нашите фанови кои се сѐ побројни, ја полнат салата на сите натпревари и постојано ни даваат поддршка. Ви Благодариме и ви закажуваме повторно дружење во нашата сала во Автокоманда.

РК АЛКАЛОИД – РК БУТЕЛ СКОПЈЕ 27-21 (11-11)
Сала: „Автокоманда“ во Скопје. Судии: Методија Илиевски и Михајло Илиевски. Контролор: Душко Камишевски
РК АЛКАЛОИД: Галевски, Трајкоски, Џонов 3, Маркоски, Младеновиќ, Серафимов 3, Карасманакис 1, Стојковиќ 2, М. Митев 3, Ѓоргиев, Велковски 3, Симоноски 1, Бинго 2, Д. Митев 6, Савревски, Димовски 3
Седмерци: 2/4 Исклучувања: 6 мин.
РК БУТЕЛ СКОПЈЕ: Блажевски, Стојаноски, Субашевски 2, Андревски 1, Пејковски, Стојановски 1, Ѓеоргиевски 2, Николов 2, Јаневски, Крстевски 2, Спасовски 1, Каевски, Јефтиќ 7, Михајловиќ 3, Цветковски, Давитковски
Седмерци: 1/2 Исклучувања: 10 мин.

РК Алкалоид го совлада РК Бутел Скопје на последниот меч пред домашната публика сезонава и остана во добар ритам по триумфот во Купот, а пред последното гостување во Битола.
Првиот дел во речиси сите елементи потсетуваше на досегашните пресметки меѓу двата клуба. Резултатски израмнето, со многу дуели, пресврти и конечни 11-11 по 30 минути игра.
Вториот дел почна во ист стил, но по шест-седум минути игра, го видовме подоброто лице на РК Алкалоид. Одбраната стана покомпактна, Марко Митев го разигра нападот, транзицијата уште еднаш ја видовме на дело и со серија од 5-0 за кратко време РК Алкалоид го реши победникот од дуелот.
Гостите не можеа да се вратат во ритам по овој блиц криг, па следуваше уште една серија од 4-0 и разликата стана убедлива, за конечно нашиот тим да слави победа од 27-21.

РК АЛКАЛОИД – РК ЕУРОФАРМ ПЕЛИСТЕР 25-23 (10-11)
Сала: „Борис Трајковски“ во Скопје. Судии: Сашо Кркачев и Ѓоко Колевски. Контролори: Ацо Николовски и Камер Металари
РК АЛКАЛОИД: Галевски, Трајкоски, Џонов, Маркоски, Младеновиќ, Серафимов 3, Карасманакис, Стојковиќ, М. Митев 2, Ѓоргиев, Велковски 4, Симоноски 4, Бинго 4, Д. Митев 4, Савревски, Димовски 1
Седмерци: 4/6 Исклучувања: 4 мин
РК ЕУРОФАРМ ПЕЛИСТЕР: Лесјак, Гедбан, Манасков 1, Цехте 3, Кузманоски, Тајник 3, Пјеховски, Борзаш, Танкоски, Радивојевиќ 2, Кузмановски 6, Петар Атанасијевиќ, Ѓорговски, Васиљев, Пешевски 7, Павле Атанасијевиќ
Седмерци: 4/4 Исклучувања: 8 мин.

Првиот пехар во сениорска конкуренција вечерва доаѓа во витрините на нашиот РК Алкалоид! Нашиот тим е победник на Куп на Македонија! Вечерва во финалето на Фајналфор турнирот, РК Алкалоид го совлада тимот на РК Еурофарм Пелистер по подобро изведување на седмерците и стана нов освојувач на овој престижен пехар.
Подобро го отворивме натпреварот и со серија од 5-0 стигнавме до разлика од плус четири гола (7-3) и напад, но се врати во игра поискусниот противник и натпреварот влезе во резултатска израмнетост која по 30 минути на крајот беше 10-11.

Противникот подобро го отвори второто полувреме и дојде до плус три гола разлика (15-12), но дојде до израз нашиот карактер. Со нова серија од 5-0 преминавме во водство (17-15) и тоа водство го чувавме до крајот на натпреварот.

Во последните 10 минути се водеше драматична битка. Постигнавме гол за водство на 30 секунди до крајот (22-21), но противникот успеа да израмни и се премина на изведување на пеналите.

Нашиот голман Иван Галевски ги одбрани шутевите на Филип Кузмановски и Емилијан Ѓорговски, додека Богдан Радивојевиќ промаши. Кристијан Симоноски, Марко Митев и конечно Иван Џонов погодија за историската победа на нашиот тим.