Вести

РК Алкалоид е во следната фаза на Европскиот Куп на ЕХФ!

РК ДРАГУНАС КЛАИПЕДА – РК АЛКАЛОИД 31-37 (17-21)
Сала: „СБВ“ во Клаипеда, Литванија. Судии: Алис Ватсон и Лине Велин од Шведска. Делегати: Венцил Калев од Естонија
РК АЛКАЛОИД: Кизиќ (3 одб), Галевски 1 (9 одб+ 1сед), Петров, Маркоски, Младеновиќ 1, Серафимов 7, Карасманакис, Стојковиќ 3, Митев 6, Ѓоргиев 3, Велковски 1, Симоноски, Бинго 6, Силва 3, Петковски 6, Савревски
Седмерци: 4/7 Исклучувања: 8 мин

РК Алкалоид ја оствари целта и со втора победа над РК Драгунас Клаипеда (37-31) се пласира во третото коло од Европскиот Куп на ЕХФ! Во еден меч во кој се водеше од почетокот до самиот крај, нашата екипа дојде до втората победа во второто соочување со ривалот од Литванија и така обезбеди место во следната фаза.

Нашиот тим имаше добро отворање на натпреварот, разигран од Бинго, Митев и Стојковиќ успеа да поведе со 6-2 по седум минути игра, а потоа следеа нови два гола на Петковски во мрежата на ривалот за дотогаш највисоко водство од 8-2, по кое домашниот тим побара тајм-аут. Важен играч во оваа серија беше и голманот Иван Галевски, кој запиша четири одбрани. Потоа очекувано, се разгоре битката, мечот доби ритам сличен на тој во Автокоманда и се редеа убави моменти и голови. По 15 минути игра Алкалоид водеше 15-8, а во неколку наврати стигна и до плус девет гола. По неколку грешки на двете страни, на паузата беше 21-17 за Алкалоид.

Во второто полувреме домашниот голман влезе во ритам против нашиот тим и така Драгунас Клаипеда почна да ја топи негативата. По десет минути игра во второто полувреме, заради нашата криза во нападот, ривалот дојде на два гола негатива (25-27). Сепак, офанзивата проработи кога беше најпотребно, па РК Алкалоид даде три гола во низа за 25-30 и пак обезбеди релаксирачки плус. До финишот на натпреварот, нашите ракометари не дозволија игра на нерви и не му дадоа шанса на ривалот да изненади.

Вести

Лазаров: Одиме на победа и на вториот меч

РК Алкалоид денеска во литванскиот град Клаипеда ќе се обиде да стигне до својата прва европска победа на гостински терен. На првата средба во Скопје, РК Алкалоид славеше убедлива победа од 11 гола разлика (42-31), но целта не е само да се одбрани разликата и да се обезбеди пласман во следното коло, туку да се извојува уште една победа над брзата екипа на Клаипеда Драгунас.
Екипата од вчера е во Литванија, одработи еден тренинг во салата во која ќе се игра натпреварот и се запозна со амбиентот во домот на литванските „змејови“.
Стручниот тим и ракометарите се оптимисти во поглед на исходот на реванш натпреварот, без оглед што имаа напорна недела во која веќе одиграа два меча, а сега одново ги чека наттрчување со литванскиот состав и тоа во нивната сала.
Натпреварот почнува во 15:00 часот.

КИРИЛ ЛАЗАРОВ, ТРЕНЕР НА РК АЛКАЛОИД
Очекувам тежок натпревар затоа што во шест дена ќе играме три натпревари и тоа не какви било, туку два натпревари од Европски Куп и еден дерби меч со Еурофарм Пелистер, а имаме едно долго патување. Свесен сум дека нема да биде лесно. Имаме хендикеп со повредата на Никола Костески, тоа треба да го споменеме. Внимателен сум, затоа што публиката во Автокоманда, виде, имаме за противник екипа што сака да игра, сака да се наттрчува цел натпревар. Анализиравме и видовме дека во 48 минута беше само шест разлика, а во 54 беше 13 разлика. Можеше да биде поинаку, можеби малку е нереален резултатот.
Имаме голема залиха, но тоа не треба да не опушта, ќе се потрудиме да бидеме квалитетни и да одиме на победа, тоа ни е целта.


Ќе биде доста неизвесно до крај, посакуваме победа, но ќе мораме да ја заслужиме. Ќе треба добро да се испотиме за да победиме, а тоа нема да биде едноставно, затоа што, реков, за шест дена играме трет силен натпревар, а имавме и долго патување. Момците се спремни, но и се исцрпени, затоа што одиграа два одлични натпревари и малку се емотивно истрошени по радоста што ја имаа по двете средби.
Ќе треба многу да трчаат, свесни сме за тоа во стручниот штаб и ќе направиме сѐ за да излгедаме добро и да победиме и сега.

ИВАН ГАЛЕВСКИ, РАКОМЕТАР НА РК АЛКАЛОИД
Победата од првиот меч од 11 гола разлика е голема, но не мора да значи ништо за тоа кој ќе победи на реванш мечот. Драгунас е квалитетна екипа што трча 60 минути и сигурно ќе бидат дополнително мотивирани по високиот пораз во Скопје.
Затоа ние ќе бидеме максимално фокусирани, мотивирани и сконцентрирани. Нема да браниме разлика, туку ќе одиме на победа, како и секогаш така и на овој натпревар.

Вести

Голема победа на РК Алкалоид на суперлигашкото дерби

РК АЛКАЛОИД – РК ЕУРОФАРМ ПЕЛИСТЕР 32-25 (16-12)
Сала: „Автокоманда“ во Скопје. Судии: Ѓорѓи Начевски и Славе Николов. Делегати: Марјан Начевски и Ацо Николовски
РК АЛКАЛОИД: Кизиќ (8 одб), Галевски (1 сед), Џонов, Маркоски, Костески 5 (2), Младеновиќ, Серафимов 8 (4), Карасманакис 1, Стојковиќ 2, Митев 2, Ѓоргиев 3, Велковски 4, Симоноски 1, Бинго 6, Силва, Петковски
Седмерци: 6/6 Исклучувања: 14 мин
РК ЕУРОФАРМ ПЕЛИСТЕР: Митревски (11 одб), Ивиќ, Манасков 3, Цехте, Ристевски 2, Ц. Кузманоски 1, Тајник, Борзаш, Радивојевиќ 2, Ф. Кузмановски 12 (6), Абутовиќ, Пешевски 1, Ѓорговски, Хосни 1, Хаџиќ, Павле Атанасијевиќ 3
Седмерци: 6/7 Исклучувања: 8 мин.

РК Алкалоид ја запиша осмата првенствена победа од исто толку одиграни натпревари, а таа е посебно важна затоа што е извојувана на дерби натпревар со актуелниот првак РК Еурофарм Пелистер.
РК Алкалоид на премиерниот меч од сезоната, на Суперкуп дуелот исто така славеше победа над РК Еурофарм Пелистер, но вечерашниот натпревар имаше сосема поинаков ритам, тек и конечен епилог.


РК Алкалоид почна брзо, одбраната функционираше на добро ниво и за само пет минути успеа да направи резултатска предност од три гола разлика 4-1. Голманот на битолскиот состав, репрезентативецот Никола Митревски успеа да скроти неколку напади во продолжение, а гостинските ракометари тоа го материјализираа и успеаја да се вратат резултатски во игра.
Никола Костески и Арно Бинго играа одличен натпревар во оваа фаза, а екипата брзо се консолидираше и најмногу што гостите успеаја да направат е израмнување на 6-6. Веднаш потоа следеше одговор и два гола во мрежата на РК Еурофарм Пелистер за ново водство од два гола разлика (8-6), а потоа таа разлика од еден-два гола беше актуелна десетина минути.
РК Алкалоид играше одличен меч, колективот функционираше на високо ниво, па наскоро следеше нов добар период по кој резултатот се искачи на 14-9.
Таа разлика ја одржа до крајот на првиот дел, по кој на семафорот беше 16-12.

Во второто полувреме, добрата колективна игра на РК Алкалоид уште еднаш даде резултат, па водството порасна и на шест-седум гола разлика, а мечот се играше во ритам гол за гол.
Пех за РК Алкалоид на денешниот натпревар е повредата на Никола Костески кој во 38 минута мораше да го напушти теренот.
Ритамот не се промени, нивото на игра остана високо и наскоро РК Алкалоид поведе и со максимални осум гола разлика (30-22).


До крајот на натпреварот бодрени од расположената публика, ракометарите на РК Алкалоид контролираа сѐ на теренот и запишаа убедлива победа од седум гола разлика.
Со оваа победа РК Алкалоид ја одбрани и разликата од два бода на првото место на табелата пред другите суперлигашки ривали.
Следниот натпревар за РК Алкалоид е закажан во сабота, во литванскиот град Клаипеда, каде што ќе го игра реванш мечот од второто коло на ЕХФ Европскиот Куп. Резултатот од првата средба е 42-31 за РК Алкалоид.

КИРИЛ ЛАЗАРОВ, ТРЕНЕР НА АЛКАЛОИД:
Вистинско дерби, одигравме многу квалитетно, ова е можеби една од нашите најдобри партии. Еурофарм Пелистер, беше под своите можности, не знам дали можеби и ние придонесовме за тоа или се малку уморни од натпреварите во Лигата на шампионите. Јас сум го играл ова и знам дека не е лесно, да се игра ваков натпревар, а веќе со мислите да си и на дуелот со Веспрем. Ние имаме максимална почит кон нив, нивниот цел тим.
Среќни сме и задоволни, реков уште по натпреварот со Клаипеда, задоволен сум од тоа како функционираме. Некој ја чувствува и вреднува таа победа, некој не, но јас почувствував дека тоа е тоа. Се одморивме, се потспремивме за ден – ден и пол.
На сите играчи им симнувам капа, на сите како тим. Им кажав дека не ми е важно кој ги постигнува головите, важно е да функционираме како тим. И засега е така и се надевам дека ќе продолжиме така“, изјави Лазаров.


Вести

Прес-конференција по натпреварот РК Алкалоид – РК Драгунас Клаипеда

РК Алкалоид има одлична шанса за пласман во следната фаза на ЕХФ Купот. „Сините“ во Автокоманда славеа убедливо над Драгунас Клаипеда (42:31) во првиот дуел од 2. коло во натпреварувањето. Со високата победа тимот на Кирил Лазаров обезбеди добра залиха пред реваншот кој ќе се игра во Литванија. По натпреварот, се одржа прес-конференција по која впечатоците ги сумираа тренерите на двата тима, како и по еден играч од двата табора.

КИРИЛ ЛАЗАРОВ (тренер на РК Алкалоид): „Горд сум на мојот тим, имам голем респект за Клаипеда, затоа што кажав пред мечот дека се добар тим. Никој не очекуваше вака висока победа од 11 гола. И покрај високиот триумф нема да се опуштиме, јас се уште мислам дека мора да внимаваме. Ние бевме подготвени за нивниот брз стил на игра, одговоривме добро и победивме еден не многу популарен, но добар ривал. Реваншот ќе биде тежок, посебно ако имаме лош пристап. Ова беше меч со вистински европски ритам.“

МАРТИН СЕРАФИМОВ (играч на РК Алкалоид): „Клаипеда имаше добар натпревар, така што гол разликата од овој прв дуел не значи ништо на втората средба. Контрата им беше убиствена, беше доста тешко да се наттрчуваме со нив, но на кррајот успеавме да славиме. Не чека уште еден меч, единаесет гола не мора да значат ништо, мора да останеме фокусирани и на реваншот за да си го потврдиме местото во следната рунда“

ХУАН АНТОНИО МОРЕНО РОДРИГЕЗ (тренер на РК Драгунас Клаипеда): „Честитки за Алкалоид за победата. Игравме доста брзо и ние и Алкалоид, но потфррливме во реализацијата пред голманите на ривалот. Против екипи како Алкалоид мора да играш многу подобро. Ние многу грешевме во одредени ситуации и тоа противникот не ни го прости“

КАРОЛИС СТРОПУС (играч на РК Драгунас Клаипеда): „Зад нас имаме еден тежок меч. Можеби ни фалат вакви натпревари за да бидеме порамноправни во иднина. Одигравме брз меч, се наттрчувавме со Алкалоид, дававме брзи голови, но потоа не погодивме неколку акции и целата концепција се распадна. Во некои клучни моменти не дадовме гол, ако успеевме во тоа, можеби ќе беше поианку. Но, тоа е тоа, ние одиме понатаму, за нас ова беше добро искуство и го чекаме реваншот во Литванија“

Вести

Успешен старт на РК Алкалоид во ЕХФ Европскиот Куп

РК АЛКАЛОИД – КЛАИПЕДА ДРАГУНАС 42:31 (18:12)
Сала: „Автокоманда“ во Скопје. Судии: Ердоган Витаку и Арсим Витаку од Косово. Делегат: Искандар Азгаров од Азербејџан
РК АЛКАЛОИД: Кизиќ (1 одб), Галевски 1 (9 одб), Џонов, Маркоски, Костески 10, Младеновиќ 1, Серафимов 6, Карасманакис 1, Стојковиќ 4, Митев 5, Ѓоргиев 4, Велковски, Симоноски 1, Бинго 9, Петковски, Савревски,
Седмерци: 6/7 Исклучувања: 10 мин.
КЛАИПЕДА ДРАГУНАС: Пакалнискис (9 одб), Коржук 1, Одиноков 2, Симонавичиус 4, Бучиус 2, Љапинаискас 4, Пуликас, Јускенас 2, Драксас 1, Цесна 1, Сматаускас 4, Буткус 6, Кајрус, Плахотињ, Стропус 4
Седмерци: 2/5 Исклучувања: 4 мин.

РК Алкалоид успешно стартуваше во ЕХФ Европскиот Куп и ја запиша својата втора европска победа. Вечерва на првиот меч од второто коло во ЕХФ Европскиот Куп, РК Алкалоид ја совлада екипата на Клаипеда Драгунас од Литванија со убедлива разлика од 11 гола.

Натпреварот имаше брз ритам од првиот момент, игра што му одговараше и на РК Алкалоид кој преферира да игра ракомет со многу трчање и брза транзиција. РК Алкалоид поведе 3-1, но и гостинскиот состав покажа дека има квалитет во нивните редови и дека добро се снаоѓа во натпревар со брз ритам, па во следните десет минути се играше израмнето.


Откако помина почетното испитување на силите и одбраната на РК Алкалоид стана посигурна и поцврста, почна да се прави и резултатска разлика. Одлична партија имаше голманот Иван Галевски кој имаше неколку успешни интервенции, по кои беа постигнати и лесни голови и РК Алкалоид почна да влегува во препознатлив ритам. Одличен натпревар одиграа и крилните играчи Костески и Бинго кои предничеа во транзиција и постигнуваа атрактивни погодоци.

По 15 минута, следеше најефективниот период во играта на сино-белите кои од резултат 9-9, дојдоа до водство од 17-10 и тоа му даде сосема поинаков тон на натпреварот.
На крајот на првиот дел резултатот беше 18-12, а во второто полувреме ритамот на играње остана ист. Гостите се обидоа и со подлабока зона и не го намалија темпото па брз ракомет се играше до крајот на натпреварот.
РК Алкалоид водеше од шест до девет гола разлика во оваа фаза од средбата, а во 50 минута беше 33-24. Разликата прв пат стана двоцифрена во 52 минута (35-25). Потоа стигна и до максималните 12 гола разлика, за на крајот средбата да заврши со резултат 42-31.

Вести

РК Алкалоид фокусиран на обврските во Европскиот Куп на ЕХФ

РК Алкалоид ја почнува својата втора европска сезона. По ланскиот настап во ЕХФ Европската лига во која ја запиша својата историска прва победа, а и првиот освоен бод на гости, сезонава РК Алкалоид ќе се натпреварува во ЕХФ Европскиот Куп.

РК Алкалоид има амбиции да стигне колку што може подалеку во овие нокаут двобои, а почнува со дуел со литванскиот вицепрвак Клаипеда Драгунас. Тоа е клуб што годинава има шампионски амбиции, за таа цел ангажираше и тренер од Шпанија, а во ЕХФ Европски Куп исто така има амбиции да стигне што подалеку. Нашиот клуб одржа прес-конференција, на која пред медиумите говореа тренерот Кирил Лазаров и капитенот Игор Ѓорѓиев.

Кирил Лазаров: „Се наоѓаме пред еден нов предизвик во Европскиот куп. Конкретно, имаме еден ривал кој што можеби е неатрактивен за нас, но е доста опасен. Се работи за незгодна школа, тим кој оваа година е воден од шпански тренер и полека од материјалите се гледа напредокот на Клаипеда. Ако направиме споредба, мислам дека, да не претерам, тие се подобри за 35% и затоа сум доста внимателен во најавите, заедно со мојот тим и со моите играчи, затоа што системот на играње е дома-гости, не е групна фаза и треба да се биде доста претпазливи. Од она што го имаме како информација, се работи за тим кој дава многу голови, над 40 гола во поголемиот дел од натпреварите. Ривалот игра во силен ритам, без разлика на противникот. Ние сме цврсто на земја заедно со играчите, добро се подготвуваме и можам да ветам дека нема да го потцениме противникот. Очекувам квалитетен меч, убав ракомет за око. Испраќам покана до навивачите, да дојдат во салата Автокоманда и да бидат поддршка на овој млад и македонски тим“

Игор Ѓорѓиев: „По одличниот старт на сезоната каде имаме седум победи, ни следува натпревар во Европскиот Куп каде имаме за противник екипа од Литванија. Го анализиравме противникот во изминатиот период, ние како екипа имаме искуство во Европската лига од лани, но оваа година ќе играме Европски Куп каде системот е поразличен. Првиот меч ни е дома, играме пред нашата публика, а кога играме дома секогаш сакаме да сме најдобри. Како капитен тврдам дека екипата е спремна, ростерот ни остана ист од лани, збогатен со неколку играчи. Ја повикувам јавноста да ни даде поддршка и се надевам на победа“

РК Алкалоид пред првиот европски предизвик се наоѓа во добар натпреварувачки ритам. Во домашното првенство го освои Суперкуп пехарот, а во суперлигата има седум победи од седум одиграни натпревари, меѓу кои и победа на дерби меч со вицепрвакот Вардар 1961.

Инаку, Европскиот Куп на ЕХФ како натпреварување се игра по поинаков систем од Европската Лига. Во овој Куп, беа вкупно 74 екипи од кои 64 се пласираа во второто коло и тие ќе играат елиминациски двобои се додека не се добие новиот шампион. Актуелен победник е екипата на Валур која во ланското финале беше подобра од грчкиот Олимпијакос. Исланѓаните нема да го бранат пехарот, тие сезонава играат во ЕХФ Европската лига, а Олимпијакос и сезонава е во ова натпреварување.