Базирано на тактичката определба да игра брз ракомет, искуството и потребите што се наметнаа од минатата сезона, РК Алкалоид во преодниот рок стратешки го дополни играчкиот ростер со нови брзи ракометари кои ќе ја забрзаат транзицијата и играта, а во таквиот концепт посебна улога ќе добие нашиот нов играч, десното крило Ненад Костески.

Ненад Костески има 24 години во кои е акумулирано искуство и од играње во странство, во екипата на РК Загреб и на меѓународната сцена на највисоко ниво, во Лигата на шампионите. Тој е стандарден репрезентативец, добро познат и на јавноста и на соиграчите и ќе донесе нови моменти во играта на РК Алкалоид. Ненад Костески зборуваше за своите очекувања и планови сезонава…

Првите импресии

„Иако сум многу кратко овде, одлично се чувствувам во новата средина. Промените се добредојдени во спортот. Јас по пет години минати во Битола се решив за промена на средината па сега со нетрпение го очекувам новиот предизвик. Првите импресии се одлични и се верувам дека сѐ ќе биде како што треба“.

Очекувањата во новата средина
„Алкалоид е клуб што има големи амбиции и високи цели. Спремно ќе ги дочекаме и ќе одговараме на сите предизвици. Очекувам дека ќе ја вратам и ќе ја искачам на највисоко ниво мојата форма. Верувам дека ќе имам шанса и минутажа во кои ќе можам да се докажам и да се вратам на тоа што сум, вистинскиот – јас.
Професионалец сум, секогаш сум сакал и сум се стремел кон тоа да победувам и се фокусирам целосно на тоа. Ќе го дадам максимумот за да придонесам најмногу што можам за клубот да направи успеси“.

Играњето во ист клуб со својот брат

„Посебно чувство и посебен момент во мојата кариера е што ќе играм во ист клуб заедно со мојот брат. Ние сме играле заедно во репрезентација, но никогаш не сме биле заедно во ист клуб. Сега ќе ни се оствари и таа желба. Секако дека тоа е многу позитивен момент за двајцата и мотивација плус на теренот“.

Екипата на РК Алкалоид ги почна подготовките за новата сезона. Ракометарите фаќаат ритам на тренирање во „Автокоманда“, има осум нови играчи кои му се приклучија на тимот, а впечатоците од актуелниот состав и очекувањата за следната сезона ги сподели нашиот тренер Кирил Лазаров.

„Целата стратегија, поставеноста на клубот е од година во година да се прави чекор напред“, вели Лазаров.
„Не сакаме тие чекори да бидат крупни, туку да одиме постепено и да го развиваме клубот. Јас како тренер сум среќен и горд што и оваа сезона останавме во истиот македонски концепт, во ростерот ќе имаме 23 играчи, од кои 21 ќе бидат македонски. Одлучивме да продолжиме по истиот пат, да даваме шанса на македонските играчи и да се биде поконкурентен како во Македонија, така и во европски рамки. Задоволен сум од во преодниот рок успеавме да донесеме нови играчи, во ростерот имаме осум нови имиња, потребно ќе ни биде време да се воиграме, затоа и малку порано стартуваме од сите останати суперлигаши.

Исто така улога играат и квалификациите за Европската лига на ЕХФ. Со новите играчи ќе работиме, за да се вклопат во системот кој го надградуваме. Позитивен и среќен сум и мислам дека како проаѓа време, ќе одиме чекор понапред. Урош Борзаш ја познава Македонија, се работи за играч со доста искуство со повеќе странски клубови, тој ќе биде додадена вредност во нашиот систем, додека Улфар Монси доаѓа од скандинавска школа, со искуство во Европската лига на ЕХФ. Тој е доста млад играч и верувам дека во нашиот тим и систем доста ќе се вклопи и ќе биде плус за нас во делот на транзицијата. “

– Планот на подготовките…

„Планот на подготовките е недела дена да сме во Скопје, потоа заминуваме за Маврово на висински подготовки. Потоа се враќаме пак во Скопје, па заминуваме на турнеја во Србија, Хрватска и Словенија каде се предвидени осум пријателски натпревари“

– Анализа на македонското првенство…

„Македонското првенство е специфично и многу тешко за играње и треба да знаете да го играте. Доста анализирав летово, правев компарации, се покажа дека во едно европско полуфинале ние даваме над 40 гола, а во македонско првенство се игра многу поспоро и не можеме да ја минеме границата од 25 гола и тука беше мојата најголема дилема.
Каде е грешката и каде би требало да се поправиме посебно во македонското првенство. Треба Европа да ни е репер, да се прилагодиме кон клубовите во европските купови, да бидеме со нив во чекор, ако сакаме да одиме напред и на клупски и на репрезентативен план, не само во сениори туку во сите категории и кај мажите и кај жените.

Оваа сезона во Македонија ќе има четири екстра-квалитетни екипи, но јас не би ги потценил и другите учесници во шампионатот. Почит и респект имам за сите. Тоа како клуб нас ни одговара, што е можно посилно првенството, толку поубаво. Самиот притисок и самото ривалство може да ни донесе само да растеме. Се надевам еден ден нема да бидат само четири, туку ќе станат осум силни тима, па ќе се натпреваруваме сите за успеси. Тоа би било одлично за македонските играчи. Форматот е таков што прави секој меч да биде како финале“

– За квалификациите во Европската лига на ЕХФ и ТСВ Хановер-Бургдорф…

„Ние како клуб одлучивме да излеземе од комфорната зона и да играме во Европската лига, по оној освоен ЕХФ Куп во кој има силни противници, тоа може да се види по листата и оваа година. Сакаме да одиме чекор понапред, прифативме ризик. Имавме малку незгодна ждрепка, добивме бундеслигаш. Успеав по ждрепката да изгледам неколку мечеви и увидов зошто во текот на Бундеслигата во поголемиот дел беа на првото место. Се работи за систем со екстра-квалитетен тренер, бивш селектор на репрезентацијата на Германија, на секое зошто има затоа. Ривалот е фаворит, но ние ќе се бориме и нема да се предадеме“

Актуелниот освојувач на ЕХФ Европскиот Куп, РК Алкалоид, денеска го имаше првиот собир во пресрет на новата сезона, а на ракометарите и членовите на стручниот тим на им се обрати Генералниот директор / Претседател на Управниот одбор на АЛКАЛОИД АД Скопје, г-дин Живко Мукаетов и им посака среќа и успех во претстојната сезона.

Тренерот Кирил Лазаров во новата сезона ќе има на располагање 23 ракометари. На денешниот прв собир беа присутни сите ракометари. Присуствуваа и Марко Митев и Никола Костески кои сѐ уште се во фаза на рехабилитација и ќе тренираат со посебен режим, а се очекува на тимот да му се приклучат во текот на есенската полусезона.
Подготовките на Алкалоид ќе се одвиваат во три етапи. Првата фаза ќе се одработи во Скопје. Следниот понеделник екипата ќе оди на десетдневни подготовки во Маврово каде што ќе ја одработи втората фаза, а потоа следува мини турнеја во Србија и Хрватска во која се планирани осум контролни натпревари со екипи од Србија, Хрватска и Словенија.

Натпреварувачката сезона за РК Алкалоид официјално ќе почне на 31 август со гостински дуел кај бундеслигашот ТСВ Хановер Бургдорф, а првиот европски меч на домашен терен ќе го одигра седум дена подоцна во Скопје.

РК Алкалоид денеска беше дел од ждрепката во квалификациите за пласман во групната фаза на ЕХФ Европската лига и за противник ја доби екипата на Хановер Бургдорф од Германија.

Два натпревара ќе се играат меѓу Алкалоид и Хановер Бургдорф, а вкупниот победник ќе се пласира во групната фаза на ЕХФ Европската Лига.

Првиот меч ќе се игра во Хановер, Германија на 30/31 август, а реванш натпреварот ќе се игра во Скопје на 6/7 септември.

РК Алкалоид го доби за противник тимот со највисок рејтинг од можните противници. Хановер Бургдорф имаше одлична сезона која на крајот ја заврши на шестото место во Бундеслигата. Нивниот тренер Кристијан Прокоп, поранешниот селектор на машката сениорска репрезентација на Германија. За претстојната сезона ги задржаа сите клучни ракометари од минатата сезона и доведоа соодветни замени за играчите што заминаа од клубот.

Во петок, РК Алкалоид ќе биде дел од уште една ждрепка во ЕХФ Европската лига. Тогаш ќе бидат формирани групите од првата фаза и РК Алкалоид ќе ги дознае имињата на сите противници со кои би се сретнал доколку успешно го комплетира двомечот со Хановер – Бургдорф.

Суперлигашките екипи го добија распоредот на натпревари за следната сезона во која во најсилната конкуренција одново ќе се натпреваруваат 12 екипи, кои по есенскиот дел ќе продолжат во Плејоф и Плејаут од по шест тима.

Ждрепката сакаше уште во првото коло да има големо дерби, а актерите ќе бидат екипата на РК Алкалоид и екипата ГРК Охрид.

Домаќин на тој натпревар ќе биде екипата на РК Алкалоид. Календарот на натпреварување со точните термини во кои ќе се играат натпреварите дополнително ќе биде составен од службите на Ракометната федерација на Македонија.

СУПЕРЛИГА СЕЗОНА 2025/26
ПРВО КОЛО:

РК Алкалоид – ГРК Охрид
РК Прилеп – РК Еурофарм Пелистер 2
МРК Куманово – РК Радовиш
РК Бутел Скопје – РК Еурофарм Пелистер
РК Пролет 62 – ГРК Тиквеш 2014
РК Струга – РК Вардар 1961

РК Алкалоид останува на својата определба и во следната сезона да биде клуб составен во најголем дел од македонски ракометари кои ќе добијат врвни услови за тренинг, ќе работат според професионална програма и ќе имаат простор за напредок преку настапите на домашната и на европската сцена.
Неколку ракометари со голем потенцијал и за клубот и за сениорската репрезентација на Македонија доаѓаат следната сезона во клубот и заедно почнуваме нова мисија што ќе биде исполнета со предизвици, на клупско и репрезентативно ниво, на домашната и на меѓународната сезона.

Ненад Костески, репрезентативното десно крило му се приклучува на РК Алкалоид следната сезона. Костески е роден стружанец, има 24 години, добро се познава со новите соиграчи преку репрезентативните настапи, а следната сезона ќе има шанса да игра и покрај својот повозрасен брат, Никола Костески кој е во РК Алкалоид сезонава.

Емилијан Ѓорговски, големиот македонски потенцијал на левата бековска позиција е наш нов ракометар. Ѓорговски исто така е стружанец, има 22 години и во РК Алкалоид ќе добие вистинска шанса да го покаже целиот свој талент и потенцијал. Беше дел од сите младински репрезентации, а повремено е член и на сениорскиот тим.

Михаил Аларов, репрезентативниот пивот кој игра одлично и во одбрана и во напад ќе биде дел од составот на РК Алкалоид следната сезона. Аларов својот потенцијал и квалитет го покажуваше низ настапите во македонското првенство и очекуваме многу брзо да се вклопи во системот на игра и сигурно ќе бидe важна алка во РК Алкалоид во сезоната што е пред нас.

По една сезона мината на калење во екипата на РК Дубочица од Србија, во редовите на РК Алкалоид се враќа десниот бек Михаил Иваноски. Развојот на Иваноски во текот на сезоната беше постојано следен од стручниот тим на РК Алкалоид и сега одново ќе биде дел од нашата екипа.

Развојната програма на РК Алкалоид како продукт за првиот тим го нуди младиот голман Ѓорѓи Николовски. Николовски е вонсериски талентиран, луциден, пожртвувано работеше во младинските категории на клубот и во екипата на РК Мулти Есенс и целосно ја заслужи шансата да дојде во првиот тим. Тој ќе го комплетира голманското трио во кое се уште и Марко Кизиќ и Иван Галевски.

Уште еден млад играч во кој РК Алкалоид препознава вонсериски талент доаѓа во нашиот клуб следната сезона. Давид Трајкоски, ракометар од позицијата лево крило ни доаѓа од редовите на РК Прилеп. Беше одличен во младинските категории, има искуство од играње во Суперлига и ќе има шанса да го покаже својот талент и квалитет и во редовите на РК Алкалоид.

Во редовите на РК Алкалоид на позицијата лев бек за следната сезона е ангажиран и Урош Борзаш, репрезентативец на Србија. Бекот шутер има богато резиме, докажани квалитети и очекуваме брзо да се вклопи во нашиот тим.