ГРК ОХРИД – РК АЛКАЛОИД 28-24 (17-11)
Сала: „Билјанини извори“ во Охрид. Судии: Виктор Начевски и Даниело Божиновски. Делегат: Камер Металари
ГРК ОХРИД: Пилиповиќ, Блажески, Ѓорѓески, Стрмљан 11, Ојлески 1, Јагуриноски 2, Иванковиќ 7, Кукуловски, Крсманчиќ, Ристески, Тасески 2, Моралес, Савревски 2, Љапис 1, Петриќ, Ѓукиќ 2
Седмерци: 0/1 Исклучувања: 8 мин.

РК АЛКАЛОИД: Кизиќ, Галевски, Џонов 2, Тордарсон 2, Серафимов 2, Карасманакис, Стојковиќ, М. Митев 5, Ѓоргиев 1, Велковски 1, Симоноски 1, Ивановски, Костески 3, Д. Митев 6, Аларов, Ѓорговски 1
Седмерци: 7/8 Исклучувања: 8 мин.

Екипата на РК Алкалоид без бодови се враќа од дерби мечот што се одигра во салата „Билјанини извори“, против домашниот ГРК Охрид.

Натпреварот беше резултатски израмнет во првите 15 минути (6-6), а потоа домашниот тим го искористи периодот во кој РК Алкалоид имаше исклучен ракометар и постигна четири гола во серија со која стигна до водство од 10-6.

Тоа беше клучниот период од натпреварот, во кој една од екипите успеа да направи конкретна разлика.

Резултатот на полувремето беше 17-11, а РК Алкалоид остана и без Марко Стојковиќ кој доби директен црвен картон во финишот на полувремето.

Во второто полувреме РК Алкалоид набрзина анулираше два гола од негативата, до 45 минута одново се врати активно во битка за бодови (20-22), но во периодот што следеше до крајот на мечот, одново не реализираа важни шутеви во клучни моменти со што му отворија шанса на домашниот тим лесно да реализира и одново да изгради разлика, доволна за да ги освои бодовите.

РК ВАРДАР 1961 – РК АЛКАЛОИД 34-28 (17-17)

Сала: „Јане Сандански“ во Скопје. Судии: Исмаил Металари и Ненад Николовски. Делегат: Марјан Начевски
РК ВАРДАР 1961: Валах (3 одб), Гогов (8 одб), Богдановски, Стојановски, Боно 5, Георгиевски 2, Митровиќ 4, Танкоски, Марчињак, Тузолана 2, Хориха 9, Атанасовски 1, Малус 5, Ќосевски, Јанковски 3, Борозан 3
Седмерци: 3/5 Исклучувања: 8 мин.

РК АЛКАЛОИД: Кизиќ (2 одб), Галевски (4 одб), Џонов, Тордарсон 2, Маркоски, Серафимов 9, Карасманакис 1, Стојковиќ 4, М. Митев 2, Ѓоргиев 1, Велковски, Ивановски 3, Костески 4, Д. Митев 2, Аларов, Ѓорговски
Седмерци: 4/6 Исклучувања: 6 мин.

РК Алкалоид прв пат сезонава не освои бод на суперлигашки натпревар. Во рамките на 11 коло, последно од првиот круг од есенскиот дел во првенството, РК Алкалоид гостуваше во салата „Јане Сандански“ во Скопје, кај екипата на РК Вардар 1961.

Дерби натпреварот го оправда епитетот и се играше квалитетен ракомет во кој во првото полувреме двата тима имаа свои моменти и водство во одредени делници. Резултатот најчесто беше израмнет, а РК Алкалоид во финишот пропушти шанса да го заврши првиот период со предност.

Во отсуство на Урош Борзаш и со рековалесценти Марко Митев и Игор Ѓоргиев кој се враќа по повреда заработена за време на репрезентативната пауза, ракометарите што настапија мораа да наоѓаат нови решенија, особено во напаѓачката формација. Покажаа завидна креативност, организираа течни акции со ефикасни решенија и по 30 минути игра резултатот беше 17-17.

Ритамот на играње беше висок, а по 45 минута пад на концентрацијата во фазата на реализација на нападите кај ракометарите на РК Алкалоид му донесе највисока предност на противникот. Во прв момент од три гола, но тоа и го наруши балансот на теренот и го пренесе притисокот врз ракометарите на РК Алкалоид. Противникот ја искористи ситуацијата и успеа да ја зголеми предноста во последните десет минути од мечот и конечно да запише победа.

Во следното коло, РК Алкалоид одново ќе игра голем дерби натпревар и ќе биде првиот тим од големата четворка што ќе оди на гостински терен кај засилениот тим на ГРК Охрид.

РК АЛКАЛОИД – РК СТРУГА 44-27 (20-13)
Сала: „Автокоманда“ во Скопје. Судии: Ненад Николовски и Исмаил Металари. Делегат: Бобан Мајнов
РК АЛКАЛОИД: Кизиќ (13 одб), Галевски, Џонов 2, Тордарсон 4, Маркоски, Карасманакис 4, Стојковиќ 6, М. Митев 2, Велковски 1, Симоноски 1, Петковски 4, Д. Митев 4, Трајкоски 5, Иваноски 4, Ѓорговски 7, Гарбески
Седмерци: 0/1 Исклучувања: 2 мин.
РК СТРУГА: Тутенкоски, Пејоски, Ѓурѓевиќ (7 одб), Мечкароски 2, Костов 4, Клењоски 1, Ферукоски 4, Вељаноски, Алиша, Махдуб 7, Костоски 2, Савески 3, Талевски, Атанасовски 4
Седмерци: 2/2 Исклучувања: 2 мин.

РК Алкалоид денеска ја запиша осмата суперлигашка победа во сезоната и останува непоразен во пресрет на дерби мечот со РК Вардар 1961 што ќе се игра во недела.

Денеска гостин во Автокоманда беше екипата на РК Струга, а РК Алкалоид ја оправда улогата на голем фаворит и уште од почетокот на натпреварот имаше комплетна контрола врз настаните на теренот.
Средбата беше одбележана со посебен момент за РК Алкалоид. Марко Митев, еден од најдобрите македонски ракометари денеска беше прв пат во составот на Алкалоид по повеќемесечна пауза поради повреда.

Марко Митев го пропушти финишот на минатата сезона и сѐ досега се подготвуваше за враќање на теренот. Денеска, конечно е во составот, што е одлична вест и за македонската репрезентација која во јануари во Данска ќе игра на ЕХФ Еуро.

Резултатски, РК Алкалоид поведе 8-4, 10-5, а на полувреме беше 19-13. Марко Стојковиќ со шест гола беше особено голгетерски расположен во првиот дел.

Резултатската доминација продолжи и во второто полувреме, па во 33 минута веќе беше двоцифрена разлика (23-13). Емилијан Ѓорговски се разигра и стигна до шест постигнати голови по 40 минути игра.
До крајот разликата растеше, за конечно семафорот да застане на резултат 44-27

РК АЛКАЛОИД – РК ЕУРОФАРМ ПЕЛИСТЕР 2 37-25 (20-11)
Сала: „Автокоманда“ во Скопје. Судии: Силвана Карбеска и Марија Илиева. Делегат: Камер Металари
РК АЛКАЛОИД: Кизиќ (7 одб), Галевски 1 (3 одб), Џонов 4, Тордарсон 2, Маркоски 2, Серафимов 8, Карасманакис, Стојковиќ 1, Ѓоргиев 1, Ивановски 1, Костески 7, Петковски 4, Борзаш, Аларов, Иваноски 1, Ѓорговски 5
Седмерци: 6/6 Исклучувања: 6 мин.
РК ЕУРОФАРМ ПЕЛИСТЕР 2: М. Фехми, Марковски 6, Лозановски, Гичев, Даневски, Велески, Митревски 7, Јовановски, Шулески, Младенов, А. Фехми, Димитровски, Белистојаноски 2, Дрогришки, Мафдух 4, Баптис 6
Седмерци: 2/3 Исклучувања: 6 мин.

РК Алкалоид запиша нова суперлигашка победа и го задржа статусот на екипа без пораз во првенството. Вечерва во Автокоманда гостин беше екипата на РК Еурофарм Пелистер 2, тим што е кандидат за место во Плејоф разигрувањето.

РК Алкалоид имаше резултатска иницијатива од почетокот на натпреварот во кој во воведните десетина минути, откако од резултат 3-3 постигна три гола во серија за водство од 6-3, разликата се движеше меѓу два и три гола се до резултат 10-9 во 17 минута.
Потоа РК Алкалоид го засили ритамот, направи нова серија, овој пат од 5-0 во која Ненад Костески учествуваше со три гола и поведе со 15-9.
Доминацијата продолжи до крајот на полувремето, а на одмор се замина со резултат 20-11. Во оваа делница, Ненад Костески беше стрелец на седум, а Мартин Серафимов на пет погодоци.

По десет минути игра во второто полувреме и натаму беше девет гола разлика за РК Алкалоид (24-15), по што гостинскиот состав успеваше во следниот период да анулира два до три гола од таа разлика и во тие рамки, шест-седум гола предност за РК Алкалоид продолжи да се движи резултатот (28-21, 47 минута).
Во последните 10 минути од мечот се влезе со резултат 29-22, а потоа РК Алкалоид во следните пет минути стигна и до двоцифрена предност (33-23), а на крајот натпреварот заврши со убедлива победа од 12 гола разлика (37-25).

Следува еднонеделна пауза во шампионатот поради обврските на репрезентацијата, а потоа РК Алкалоид во 10 коло ќе игра на домашен терен против екипата на РК Струга.

РК АЛКАЛОИД – РК БУТЕЛ СКОПЈЕ 32-25 (18-13)
Сала: „Автокоманда“ во Скопје. Судии: Виктор Начевски и Даниело Божиновски. Делегат: Марјан Огњановски
РК АЛКАЛОИД: Галевски (11 одб), Кизиќ (5 одб), Џонов 1, Тордарсон 2, Маркоски, Серафимов 4, Карасманакис 3, Стоковиќ 7, Ѓоргиев 2, Велковски 2, Ивановски 1, Костески 5, Петковски 1, Боразш 3, Аларов, Ѓорговски 1
Седмерци: 3/3 Исклучувања: 14 мин.

РК БУТЕЛ СКОПЈЕ: Трајкоски (18 одб), Стојановски, Субашевски 2, Тодески, Ѓоргиевски 1, Николов 4, Новаковски, Спасовски, Т. Узунчев 4, Д. Узунчев 7, Киселовски, Каевски 1, Николоски, Михајловиќ 5, Казакаи 1, Гришкашвили
​Седмерци: 2/3 Исклучувања: 6 мин.

РК Алкалоид ја запиша петтата суперлигашка победа сезонава. На домашен терен во Автокоманда, РК Алкалоид го совлада тимот на РК Бутел Скопје (32-25) и му го нанесе вториот првенствен пораз.

Воведните шест минути од натпреварот беа клучните на натпреварот и ја одредија насоката во која настаните продолжија да се развиваат. РК Алкалоид во првите шест минути од натпреварот поведе со 5-0, во 10 минута беше 8-3 и резултатот постојано беше плус пет или плус шест гола за РК Алкалоид. Само еднаш во 25 минута гостите намалија на четири гола (13-17) пред крајот на полувремето.
Одговорот на сино-белите беше уште еден фуриозен старт, овој пат на второто полувреме. Постигнаа шест гола по ред во вкупната серија од 7-0 со која ја пробија и двоцифрената бариера и поведоа со 24-13.

Потоа беше воспоставен баланс, резултатот се движеше меѓу 10 и 11 гола разлика сѐ до финишот во кој гостинскиот состав успеа да го ублажи поразот.

МРК КУМАНОВО – РК АЛКАЛОИД 21-35 (10-17)
Сала: „Куманово“ во Куманово. Судии: Виктор Андонов и Александар Вукашиновски. Делегат: Ацо Николовски
МРК КУМАНОВО: Антевски, Трајковски (5 одб), Димевски 2, Димитров, Вујичевски 2, Цветковски, Цековски 5, Стојановски 1, Трифуновски, Крстаноски 1, Матачиќ 1, Иванов, Да Силва 1, Стојков 3, Михајловски
Седмерци: 3/6 Исклучувања: 4мин.
РК АЛКАЛОИД: Галевски (4 одб), Николовски (5 одб), Џонов 2, Тордарсон 5, Маркоски, Серафимов 8, Карасманакис, Стојковиќ 3, Ѓоргиев 3, Ивановски 2, Костески 5, Петковски, Борзаш 1, Аларов, Иваноски 1, Ѓорговски 5
Седмерци: 4/5 Исклучувања: 10 мин.

РК Алкалоид запиша уште една убедлива првенствена победа, во шестото коло, на гостински терен кај екипата на МРК Куманово.

РК Алкалоид важеше за фаворит на овој натпревар и ја оправда таа улога од почетокот на натпреварот во кој уште по десет минути имаше конкретно водство (6-2). Резултатскиот баланс беше постигнат откако РК Алкалоид поведе со шест гола разлика и до крајот на првиот дел водството се движеше меѓу пет и шест гола, а на полувреме резултатот беше 10-17.

РК Алкалоид беше доминантниот тим и во вториот дел во кој по десет минути игра поведе со двоцифрена разлика (25-15), а потоа одново дојде период на резултатски баланс при што разликата се движеше меѓу девет и десет голови.

Во последните десет минути од мечот РК Алкалоид почна нова серија и од 29-19, поведе со 33-19, а потоа и со 35-20 што беше и највисоката разлика на натпреварот.