РК АЛКАЛОИД – РК СТРУГА 33-22 (16-8)
Сала: „Автокоманда“ во Скопје. Судии: Методија Илиевски и Михајло Илиевски. Делегат: Ерик Белимов.

РК Алкалоид: Кизиќ, Галевски, Тордарсон 5, Сухолежник 1, Никола Костески 6, Стојковиќ 3, М. Митев 1, Ѓорѓиев 2, Велковски 2, Николов 4, Петковски 3, Д. Митев 5, Борзаш 1, Аларов, Ѓорѓовски.
Седмерци: 6/7. Исклучувања: 12 минути.

РК Струга: Тутенкоски, Пајкоски 1, Петров 1, Костовски 1, Рајатоски, Јукиќ 1, Родиќ 4, Шилегов 5, Танкоски 1, Георгиевски, Димоски, Крстаноски 2, Манасков 4, Костоски 1, Симоновски 1, Костадиновски.
Седмерци: 5/5. Исклучувања: 18 минути.

РК Алкалоид, три дена пред првиот европски натпревар во новата сезона, го одигра мечот од седмото коло во македонската Суперлига, во кој гостин во „Автокоманда“ беше екипата на Струга.

Избраниците на тренерот Кирил Лазаров не трошеа многу време на денешниот натпревар. За само шест минути, од осмата до 14. минута од првиот дел, ги отстранија сите дилеми, откако направија серија од 6-0 и од резултатот 3-3 поведоа со 9-3.

На полувремето беше 16-8, а по четири минути игра во второто полувреме разликата за првпат стана двоцифрена (19-9). Натпреварот продолжи во ист ритам и во следните десет минути, по што во 44. минута РК Алкалоид ја достигна најголемата предност од 14 гола (27-13). Оваа разлика се задржа речиси до крајот на мечот, односно до 57. минута. Потоа, со три гола по ред, гостинскиот состав го ублажи поразот.
Никола Костески со шест и Улфар Тордарсон со пет гола беа најефикасните ракометари во редовите на РК Алкалоид.

ГРК ОХРИД – РК АЛКАЛОИД 26-24 (15-11)
Сала: „Билјанини извори“ во Охрид. Судии: Методија Илиевски и Михајло Илиевски. Делегати: Марјан Начевски и Славчо Каланоски.
ГРК Охрид: Славиќ, Ѓорѓески, Стрмљан 4, Ојлески, Јошида 5, Иванковиќ 5, Карапалевски, Тасески, Савревски, Мате 6, Љапис 2, Талески, Зечевиќ 1, Ивановски, Ѓукиќ 3, Ќосевски.
Седмерци: 5/8. Исклучувања: 12 минути.

РК Алкалоид: Николовски, Галевски, Џонов, Тордарсон 1, Сухолежник 1, Костески 6, Стојковиќ 1, М. Митев 2, Ѓоргиев 1, Николов, Цехте 1, Петковски 1, Д. Митев 4, Борзаш 3, Аларов 1, Борозан 1.
Седмерци: 5/6. Исклучувања: 8 минути.

Екипата на РК Алкалоид не успеа да освои бодови на дерби натпреварот со ГРК Охрид од шестото коло што се играше во салата „Билјанини извори“ во Охрид.

ГРК Охрид поведе со 2-0 и 3-1, но РК Алкалоид брзо одговори и со серија од 4-0 го презеде водството. Во 12. минута избраниците на Кирил Лазаров имаа предност од два гола (5-3), а три минути подоцна стигнаа и до максималните плус три (7-4). ГРК Охрид возврати со два гола во низа и ја намали негативата на само еден гол (6-7).

ГРК Охрид успеа да израмни на 7-7, а неколку минути подоцна и повторно да поведе (9-8), по што тренерот на РК Алкалоид, Кирил Лазаров, побара тајм-аут. Сепак, наместо одговор од РК Алкалоид, следеа два гола по ред на ГРК Охрид, кој за првпат во овој период се одлепи на плус три (11-8). Никола Костески реализираше седмерец за прекин на серијата на домашниот тим, но ГРК Охрид постигна уште два гола и ја зголеми предноста на 13-9.

Во последните секунди од првото полувреме, при резултат 14-11, РК Алкалоид се обиде да ја намали негативата со напад без голман. Двата тима во тој момент имаа по еден играч помалку на теренот, но РК Алкалоид ја загуби топката, а ГРК Охрид ја искористи празната мрежа за гол и предност од 15-11 на паузата.

Првите десет минути од второто полувреме му припаднаа на ГРК Охрид, кој во 41. минута поведе со највисоки шест гола разлика (19-13). Но, РК Алкалоид не се предаде и во следните седум минути успеа да се врати во натпреварот. Гостите ја намалија негативата на три гола (21-18), а имаа и напад за да дојдат на минус два и дополнително да го направат финишот неизвесен.
Сепак, ГРК Охрид го издржа налетот на РК Алкалоид, повторно изгради предност од пет гола и успеа да ја задржи до крајот на натпреварот, за победа од 26-24.

РК АЛКАЛОИД – ГРК ТИКВЕШ 31-30 (18-15)
Сала: „Автокоманда“ во Скопје. Судии: Силвана Карбеска и Марија Илиева. Делегат: Васил Зипески.
РК АЛКАЛОИД: Галевски, Николовски, Тордарсон 3, Никола Костески 5, Стојковиќ 1, М. Митев 5, Ѓорѓиев, Велковски, Николов 3, Цехте 2, Ненад Костески 1, Петковски, Борзаш 4, Аларов 4, Ѓорговски, Борозан 3.
Седмерци: 2/3. Исклучувања: 4 мин.

ГРК ТИКВЕШ: Велков, Бакев, Јовевски 2, Цејовиќ, Цековски 3, Тодоров, Гавидија 4, Димовски 1, Димковски 3, Лазов 4, Ѓорѓиев, Симиќ, Ончев 4, Солeв, Бен Махфуд 7, Габара 2.
Седмерци: 2/2. Исклучувања: 4 мин.

РК Алкалоид го совлада тимот на ГРК Тиквеш, ја запиша петтата првенствена победа и остана со максимален ефект во новата сезона во најсилната конкуренција на домашната сцена.
Натпреварот со кавадаречкиот тим, неочекувано, имаше драматична завршница во која, сепак, ракометарите на РК Алкалоид беа поприсебни и избегнаа непријатно изненадување.

Почетокот на натпреварот беше добар за ракометарите на РК Алкалоид. Поведоа со 3-1, потоа беше 6-3, но им дозволија на гостинските играчи да се вратат во игра и да израмнат на 7-7. Следеше брз одговор, само две минути подоцна одново беше плус три (10-7) и одново ритамот го диктираа ракометарите на тренерот Кирил Лазаров.
До крајот на првиот дел се играше гол за гол, а полувремето заврши со три гола предност за РК Алкалоид (18-15).

Почетокот на вториот дел одново беше добар за сино-белиот тим и следеше зголемување на предноста на плус пет гола во 32. минута (21-16). Пет минути подоцна, разликата беше иста, 25-20, а во 50. минута РК Алкалоид и натаму имаше комотна предност (28-24).

Во последните 10 минути, ракометарите на РК Алкалоид ја искомплицираа ситуацијата. Гостинскиот состав се обидуваше да се врати во игра, а преголемата комоција на ракометарите на РК Алкалоид му отиде во прилог и му овозможи да креира драматична завршница. Со серија од 3-0, која започна во 56. минута, гостинските ракометари стигнаа до израмнување (30-30) во 58. минута.
Тренерот Лазаров побара тајм-аут, потоа преку Костески Алкалоид повторно дојде до водство од 31-30 и потоа одигра добро во одбрана, не дозволувајќи му на противникот да постигне гол за ново израмнување.

РК АЛКАЛОИД – МРК КУМАНОВО 37-21 (16-9)
Сала: „Автокоманда“ во Скопје. Судии: Михајло Илиевски и Методија Илиевски. Делегат: Душко Камишевски
РК АЛКАЛОИД: Галевски, Николовски, Тордарсон 5, Сухолежник, Стојковиќ 3, М. Митев 3, Ѓоргиев, Велковски 1, Николов 5, Цехте, Костески 3, Петковски 5, Д. Митев, Борзаш 3, Ѓорговски 3
Седмерци: 5/8 Исклучувања: 8 мин.
МРК КУМАНОВО: Младеновиќ, Цавејски, М. Трајковски, Г. Трајковски 2, Мечкароски, Димитров 1, Вујичевски, Костов 9, Цветковски, Стојановски 2, Новаковски, Цветковски, Гичев 3, Мохамед Алу, Радван Ибрахим, Омар Радван 4
Седмерци: 7/7 Исклучувања: 10 мин.

Екипата на РК Алкалоид го совлада тимот на МРК Куманово и ја запиша третата првенствена победа сезонава.
Гостинскиот состав доста солидно ги одигра првиот дел од првото полувреме. РК Алкалоид водеше од првата минута, но вршеа притисок гостинските ракометари повеќе од 20 минути (10-8, 23 минута).

Потоа комплетно ја презема контролата екипата на РК Алкалоид. Со два погодока на Емилијан Ѓорговски и еден на Марко Митев, РК Алкалоид поведе со 13-8 што беше првото поголемо водство на натпреварот, но и најава за тоа во кој правец ќе се развиваат настаните во продолжението на натпреварот.
До крајот на полувремето, РК Алкалоид кој беше и домаќин на оваа средба, стигна до предност од 16-9.
Разликата од 6-7 гола предност беше актуелна и во првите десетина минути од второто полувреме. Потоа РК Алкалоид стигна и до плус девет гола (21-12, 41 минута), а прв пат разликата стана двоцифрена во 48 минута кога Тордарсон од контранапад погоди за 27-17. До крајот на натпреварот, РК Алкалоид ја зголеми предноста и ја потврди победата.

РК ЕУРОФАРМ ПЕЛИСТЕР 2 – РК АЛКАЛОИД 27-31 (10-11)
Сала: „Боро Чурлевски“ во Битола Судии: Иван Илиевски и Александар Суко̀вски
Делегат: Игор Огненов

РК ЕУРОФАРМ ПЕЛИСТЕР 2: Фехми, Младенов (4 одб), Димевски 7, Лозановски 1, Стојков 2, Митревски 2, Шулевски 2, Лазаревски, Илиески 2, Дамчевски, Симоновски 1, Славков, Крстевски, Дрогришки 1, Ѓорѓиевски, Симоновски 9
Седмерци: 3/4 Исклучувања: 10 мин.
РК АЛКАЛОИД: Кизиќ (2 одб), Галевски (11 одб), Џонов 1, Тордарсон 3, Сухолежник, Стојковиќ 2, М. Митев 6, Ѓоргиев 4, Велковски, Цехте 3, Ненад Костески 5, Петковски 1, Д. Митев, Борзаш 2, Аларов 2, Борозан 2
Седмерци: 4/5 Исклучувања: 6 мин.

Екипата на РК Алкалоид стигна до втората првенствена победа, откако на гостувањето во Битола го совлада РК Еурофарм Пелистер 2 со 31-27. РК Алкалоид во текот на целиот натпревар ја имаше резултатската иницијатива и, иако во неколку наврати дозволи домаќинот да се доближи, во завршницата остана смирен и го приведе натпреварот до крај.

РК Алкалоид во првиот дел играше со мал број голови. До 18. минута беше 6-6, а потоа следеше првата серија. Со четири последователни гола РК Алкалоид стигна до 10-6 и презема контрола врз натпреварот.

До крајот на полувремето следеше период со повеќе грешки и прекини во играта, па предноста се намали. По 10-6, РК Алкалоид дозволи домаќинот да намали на 8-10, а потоа и на 9-11. На одмор замина со минимална предност – 11-10.

На почетокот на вториот дел РК Алкалоид повторно ја презеде контролата врз резултатот. По израмнувањето на 13-13 во 34. минута, ракометарите на Кирил Лазаров повторно најдоа решение во нападот и го одржуваа водството. Играта се одвиваше во серија напади во кои Алкалоид поведуваше, а домаќинот успеваше да израмни.

Клучниот период дојде по 16-16. Алкалоид повторно направи серија од 4-0 и во 43. минута стигна до 20-16. Со подобра игра во одбрана, контрола на нападот и искористување на грешките на противникот, гостинскиот состав ја врати предноста од четири гола.

Во продолжението домаќинот се обидуваше да ја промени сликата, но РК Алкалоид не дозволи натпреварот да му излезе од контрола. Во неколку наврати предноста се намалуваше, но секогаш имаше брз одговор.
Во 54. минута РК Алкалоид имаше 28-24, а во последните минути рутински го одржа водството и стигна до конечните 31-27.

Кај РК Алкалоид најефикасен беше М. Митев со шест гола, Ненад Костески постигна пет, Ѓоргиев четири, а Тордарсон, Цехте и Борзаш по три. Значаен придонес имаше и Галевски со 11 одбрани.

РК АЛКАЛОИД – РК МУЛТИ ЕСЕНС 38-28 (16-11)
Сала: „Автокоманда“ во Скопје. Судии: Виктор Андонов и Глигор Ќаев. Делегат: Владимир Саздовски
РК АЛКАЛОИД: Галевски, Николовски 2 (9 одб), Тордарсон 1, Сухолежник, Стојковиќ 7, М. Митев 5, Ѓоргиев, Велковски 3, Цехте, Ненад Костески 1, Петковски 5, Д. Митев 9, Борзаш 4, Ѓорговски 1, Борозан 1
Седмерци: 4/5 Исклучувања: 8 мин.
РК МУЛТИ ЕСЕНС: Великиќески (1 одб), Јорданов (11 одб), Ј. Петрески, Џигероски 4, Илиевски 1, Ѓокески 3, Трајковски 1, М. Петрески 1, Гурмешевиќ 1, Матевски 2, Ковачевиќ 1, Ѓоргиески, Дамчевски 6, Трајкоски, Гарбески 1, Тевдовски 1
Седмерци: 6/9 Исклучувања: 4 мин.

РК Алкалоид ги запиша првите првенствени бодови во новата сезона, откако во првото коло на домашен терен го совлада тимот на РК Мулти Есенс кој годинава има нов тренерски тим предводен од Никола Матлиески.
Двете екипи играа брз ракомет во кој резултатски подобро се снајде РК Алкалоид, но Давид Трајкоски од РК Мулти Есенс кој постигна шест погодоци во првиот дел, беше најдобриот стрелец на теренот. РК Алкалоид по десетина минути игра имаше водство од 5-2, потоа таа разлика постепено се зголемуваше и достигна пет гола разлика на полувреме (16-11).

Алкалоид направи серија од 5-0 со која поведе со 21-11 и од тој момент, ритамот на играње беше посмирен во второто полувреме. Дамчевски и Џигеровски во тимот на РК Мулти Есенс беа најдобро реализаторски расположени, додека Дамјан Митев и Александар Петковски во тимот на РК Алкалоид беа главните стрелци.
Конечниот резултат е 38-28, а добар впечаток оставија и двата тима со прикажаната игра.