Ракометниот клуб Алкалоид направи голем успех за македонскиот ракомет, со пласман во финалето во Европскиот Куп на ЕХФ преку норвешки Рунар Сандефјорд, кого, во реваншот по победата од пет гола во Скопје, го совлада по изведувањето на пенали (регуларен дел 34:29, 1:3 по пенали).

Тимот кој е актуелен Куп-освјувач на Македонија и е составен од 95% македонски ракометари, благодарение на овој резултат обезбеди меч за европски трофеј и стана петтиот клуб од нашата земја кој ќе игра за едно европско одличје.

Противник на Алкалоид во европското финале ќе му биде грчкиот клуб АЕК од Атина кој во полуфиналето го елиминира Извиѓач од БиХ, а датумите на мечевите во Скопје и Атина ќе бидат утврдени со ждрепка.

На радоста на играчите во Норвешка по овој голем успех за млад клуб како Алкалоид ѝ немаше крај, сите во еден глас прославија со „осмиот играч“ – публиката. Стотици Македонци дадоа поддршка за Алкалоид на ова гостување, претежно нашинци кои живеат во земјата.

РК РУНАР САНДЕФЈОРД- РК АЛКАЛОИД 34-29 (19-15) Пенали: 1-3

Сала: „Рунархолен“ во Сандефјорд, Норвешка. Судии: Франческо Симоне и Пјетро Монотиљо од Италија. Делегат: Хеинур Леифстад од Исланд
РК РУНАР: Бјронстад, Тригестад, Окерн, Гурих 8, Грам, Рамбо 6, Хоген 1, Боје, Линдел 3, Бергли 2, Ривешјо 1, Миклебаст 2, Сјурсен 1, Кнутсен 2, Венемир 1, Вулвик 7
Седмерци: 2/2 Исклучувања: 6 мин.

РК АЛКАЛОИД: Кизиќ, Галевски, Џонов 3, Маркоски, Младеновиќ, Серафимов 7, Карасманакис 1, Стојковиќ 1, Велковски 4, Симоноски, Ивановски 4, Бинго, Франциско 1, Петковски, Митев 8, Савревски
Седмерци: 6/7 Исклучувања: 8 мин.

Седмерци:
1-0 Серафимов
1-1 Ривешјо
1-2 Митев
1-3 Петковски

РК Алкалоид е во финалето на ЕХФ Европскиот Куп! Нашиот тим ја одбрани разликата од првиот меч во Скопје и по подобро изведување на седмерци го елиминираше норвешкиот претставник Рунард Сандефјор.

Конечниот резултат од регуларниот дел е 34-29, а по изведување на пенали, РК Алкалоид славеше со 3-1 и во големото финале, за победничкиот пехар ќе игра со екипата на АЕК од Грција.

Финалните натпревари ќе се играат на 17/18 мај и 24/25 мај.

Норвешкиот состав подобро го отвори натпреварот и поведе со 6-1 што беше вовед во 50 минутна жестока битка во која се наттрчуваа играчите и се надмудруваа клупите. Норвешкиот тим имаше контрола, но РК Алкалоид покажа карактер, се бореше трпеливо и успеа во првото полувреме да намали на 13-16, а на полувреме беше 19-15.

Во вториот дел РК Алкалоид се доближи и на два гола разлика, иако некомплетен успеваше да се спротивстави, но домашниот состав во финишот на натпреварот успеа да влезе во серија што го одведе до конечните 34-29.

По ова, победникот на двомечот се решаваше со изведување на седмерци, а РК Алкалоид беше поуспешен и се пласираше во големото финале.

РК АЛКАЛОИД – РК БУТЕЛ СКОПЈЕ 33-30 (16-13)
Сала: „Автокоманда“ во Скопје. Судии: Исмаил Металари и Ненад Николовски. Делегат: Љупчо Јаневски
РК АЛКАЛОИД: Кизиќ, Џонов 4, Младеновиќ, Серафимов 11, Карасманакис, Стојковиќ 1, Ѓоргиев 1, Велковски 2, Ивановски 2, Бинго 4, Франциско 2, Петковски 4, Митев 2, Савревски, Гарбески
Седмерци: 8/10 Исклучувања: 10 мин.
РК БУТЕЛ СКОПЈЕ: Стојаноски, Блажевски, Субашевски 1, Тодески 5, Ѓеоргиевски 2, Николов 11, Новаковски, Спасовски 1, Т. Узунчев 1, Д. Узунчев, Милошески, Киселовски, Каевски, Михајловиќ 4, Шолиќ 3, Давитковски 1
Седмерци: 1/2 Исклучувања: 16 мин. 

РК Алкалоид ја запиша третата плејоф победа во македонската Суперлига. Само со еден ден пауза по натпреварот од полуфиналето на ЕХФ Европскиот Куп, во домашното првенство во Автокоманда гостуваше екипата на РК Бутел Скопје.
РК Алкалоид запиша победа од 33-30 и освои нови два бода до кои дојде потешко од вообичаено, но и во согласност со очекувањата имајќи го предвид распоредот на одиграни и на натпреварите што претстојат.

Дуелите меѓу РК Алкалоид и РК Бутел Скопје имаат своја тежина и шарм на градско дерби, па така беше и вечерва. Гостите се прикажаа во борбено издание и беа резултатски рамноправни, но РК Алкалоид беше екипата што го диктираше резултатот во текот на сите 60 минути и ниту еднаш не беше во негатива.

РК Алкалоид водеше од почетокот, а гостинскиот состав успеваше да израмнува се до резултат 9-9. Потоа РК Алкалоид поведе со два гола разлика (11-9), потоа и со 12-9 и 13-10 и разликата ја одржа до полувремето.

Во вториот дел, РК Алкалоид имаше и плус четири (17-13), но гостинскиот состав влезе во ритам и успеа да израмни на 17-17.
Потоа одново почна игра гол за гол, а набрзо РК Алкалоид имаше одново водство од три гола 23-20, по што до крајот на мечот разликата се движеше меѓу два и три гола.
Имаше РК Алкалоид шанса да зголеми и на плус четири, има имаа и гостите шанса да намалат на минус еден, но не се случи ниту едното ниту другото по вина на голманите кои беа фокусирани во тие моменти. Во финишот на натпреварот, РК Алкалоид стигна до максималната разлика (33-29), а гостите само го ублажија поразот. 

РК Алкалоид веќе во недела ќе игра нов голем меч, гостува во Норвешка каде што во реваншот од полуфиналето ќе стартува со пет гола предност во одност на домашниот Рунар Сандефјорд. 

РК Алкалоид забележа победа над РК Рунар Сандерфјорд (42:37) во првиот полуфинален дуел во рамки на Европската лига на ЕХФ. По мечот се одржа стандардната прес-конференција на која видувања на мечот во Скопје дадоа тренерите на двата табори, како и по еден играч претставник на тимовите.

Кирил Лазаров (РК Алкалоид): „Очекував тежок меч, имавме доста материјал за Рунар. Играат добро цела сезона и во лигата и во Европскиот Куп. Ги почитуваме, победивме со пет гола, но имаме седум дена да се подготвиме добро за реваншот. Сигурен сум дека реваншот ќе биде многу потежок од овој дуел. Можеби ја заслуживме победата, но не со пет гола. Можеби еден до два, но не повеќе.“

Иван Џонов (РК Алкалоид): „Сакам да му честитам на противникот Рунар. Се работи за добар тим, играат брз ракомет, беше тешко да се држи ритам со нив, но успеавме да славиме. Знаат да играат добро и седум на шест, ќе мора да се подготвиме добро за реваншот.“

Бјарте Мирхол (РК Рунар Сандефјорд): „Најпрво, честитки за мечот. Беше како што очекувавме. Го анализиравме Алкалоид, знаевме дека играат брз ракомет исто како нас. Имавме проблеми во одбраната и да ја сопреме нивната игра. Да се прими 42 гола е многу. Околу надмудрувањето со Лазаров со кого бев соиграч во минатото, Кирил беше еден од најпаметните играчи, а сега одигра доста добра игра игра која добро не изолира. Очекував тактички меч, затоа што тој беше важен и за двата тима. Но, во интернационалниот ракомет има многу промени, видовме дека тој знаеше како да не изолира и не изненади. Беше чест да се игра во Скопје против Лазаров и Алкалоид“

Ларс Гурич (РК Рунар Сандефјорд): „Одигравме меч со брз ракомет. Бевме многу добро изолирани од Алкалоид. Мора да се подобриме за реваншот и подобро да се подготвиме“

Реваншот меѓу РК Алкалоид и РК Рунар Сандефјорд е на 27 април од 17:00 часот во Норвешка. Таму е назначена италијанската судиска двојка Франческо Симоне и Пјетро Монитиљо, а делегат е Хлинир Леифсон од Исланд.

РК АЛКАЛОИД – РУНАР САНДЕФЈОРД 42-37 (21-20)
Сала: „Автокоманда“ во Скопје. Судии: Ѓоргиос Панајидес и Мариос Андреу од Кипар. Делегат: Владимир Сокол од Хрватска

РК АЛКАЛОИД: Кизиќ (3 одб), Галевски (4 одб), Џонов 6, Маркоски, Младеновиќ, Серафимов 10, Карасманакис 4, Стојковиќ 4, Ѓоргиев 4, Велковски 2, Ивановски 3 Бинго 1, Франциско 2, Петковски 4, Митев 1, Савревски
Седмерци: 6/7 Исклучувања: 4 мин.

РУНАР САНДЕФЈОРД: Бјорнстад (2 одб), Тригестад (6 одб), Окерн 1, Гурих 3, Грам, Рамбо 11, Хоген, Боје, Линдел 3, Бергли, Ривешјо 4, Миклебуст 5, Сјурсен, Кнутсен 7, Венемир, Вулвик 4
Седмерци: 2/3 Исклучувања: 10 мин.

РК Алкалоид го совлада норвешкиот претставник Рунар Сандефјорд со 42-37 на првиот натпревар од полуфиналето на ЕХФ Европскиот Куп. Натпреварот се играше во Скопје, а реваншот е следната недела во Норвешка. Вкупниот победник ќе игра во големото финале на ова европско натпреварување.

Натпреварот меѓу РК Алкалоид и Рунар Сандефјорд ги надмина очекувањата во поглед на интензитетот и брзината со која се играше и се одвиваа настаните на теренот. Двата тима форсираа игра со брза транзиција која доведе и до голем број на напади и постигнати голови, а нашиот тим подобро се снајде од норвешкиот во стилот на игра што е заштитен знак на скандинавскиот ракомет.

Гостите имаа за нијанса подобро отворање на натпреварот, а и среќата им беше наклонета во воведните напади во кои ракометарите на РК Алкалоид двапати шутираа во конструкцијата на голот. Тоа резултираше со почетно водство од 3-1 и 4-2 за гостинскиот состав, но брзо следеше консолидација, два гола по ред во мрежата на норвешкиот тим и резултатот беше израмнет (4-4), а веднаш потоа РК Алкалоид ја презема контролата.

Во играта гол за гол што следеше, гостите се решија да напаѓаат со седум ракометари што дополнително ја отежна работата на дефанзивната линија.

По 20 минути игра, РК Алкалоид успеа да поведе и со три гола разлика (15-12), но до крајот на полувремето норвешкиот тим се врати резултатски и на одмор се замина со резултат 21-20.

Гостинскиот состав својот врв го достина во 40 минута кога поведе со 29-27, по што РК Алкалоид почна да игра поагресивно во одбраната и влезе во мини серија од 3-0, па одново премина во водство.

РК Алкалоид во два наврати во текот на натпреварот не реализираше напад за плус четири гола, но конечно и тоа му појде од рака па за прв пат имаше плус четири гола при резултат 36-32.
Потоа почна жестока битка за одбрана на таа разлика, а кога и играта 7 на 6 беше казнета со гол на празна мрежа, РК Алкалоид запиша водство од 41-36.
До крајот на натпреварот двата тима постигнаа уште по еден гол за конечните 42-37.

Мартин Серафимов со 10 гола и Иван Џонов со седум погодоци од исто толку обиди беа најефикасните играчи во редовите на РК Алкалоид, додека ветеранот Кристофер Рамбо со 11 постигнати гола беше најефикасниот играч на натпреварот.

Следниот меч на РК Алкалоид е во вторник во македонската Суперлига против РК Бутел Скопје, а потоа следува реваншот од полуфиналето.

РК Алкалоид е пред нов европски предизвик! Нашиот тим е во исчекување на првиот меч од полуфиналето на Европскиот Куп на ЕХФ, каде ќе се соочиме со РК Рунар Сандефјорд од Норвешка. Првиот натпревар го играме во Скопје, додека реваншот е на гостинско тло, а подобриот од двомечот патува во големото финале.

Пред натпреварот, РК Алкалоид одржа прес-конференција на која тренерот Кирил Лазаров и капитенот Игор Ѓорѓиев ги сумираа своите досегашни впечатоци за ривалот од норвешкиот ракомет и ја најавија првата средба во Скопје.

Кирил Лазаров: „Не очекува еден тежок меч против незгоден противник. Во изминатиот период имавме доста тешки натпревари, со квалитетни противници во лигата во рамки на плеј-офот. Доста го анализиравме Рунар, со доста материјали. Имаме доста информации кои ни покажуваат дека се работи за сериозна екипа со скандинавски стил кој не ни одговарал многу низ историјата. Рунар до полуфиналето дојде со победи над квалитетни ривали како Целје, Бешикташ и Олимпијакос. Сите овие противници кои ги набројав Рунар ги елиминира во двомеч, така што не очекува доста тежок натпревар не само во Скопје, туку и во Норвешка. Пласманот во полуфиналето со македонски сили секако дека е успех, се надевам дека ќе имаме сила и енергија по тешките мечеви да излеземе на терен и да водиме тешка борба во целите 60 минути, знаејќи го нивниот стил.“

Игор Ѓорѓиев: „Не очекува меч од огромно значење. Прво европско полуфинале за нас. Голем момент како за Алкалоид, така и за македонскиот ракомет. Како екипа горди сме што успеавме да се пласираме во оваа фаза и да играме за финале. Рунар е екипа која игра типичен брз скандинавски ракомет, првиот меч ни е дома. Затоа сакам да ги повикам сите љубители на ракометот да бидат наша поддршка, наш седми играч и да се бориме за историски момент и европско финале. Со оглед на тоа дека имаме тројца или четворица играчи повредени, јас како капитен свесен сум, а и играчите дека мора да функционираме како тим. Ако продолжиме така како што играме до сега, имаме огромни шанси како во европскиот Куп така и во плеј-офот во лигата“

Натпреварот меѓу РК Алкалоид и РК Рунар Сандефјорд се игра во салата „Автокоманда“ во недела (20.4) со почеток од 19:00 часот. Главни судии се Георгиос Панајидес и Мариос Андреу од Кипар, додека делегат на натпреварот е Владимир Сокол од Хрватска.