РК Алкалоид се враќа во домашна акција. Нашиот тим ги продолжува настапите во Суперлигата, каде во рамки на вториот дел од натпреварувањето, тоа е плеј-офот, ја почнува битката за највисок дострел – титулата во македонскиот ракомет и пласманот во еврокуповите на ЕХФ.

Зад себе нашиот клуб го остави најуспешниот прв дел досега, затоа што на 14 одиграни натпревари во Групата „А“ од Суперлигата забележа 14 победи. Целосниот фокус сега е кон плеј-офот каде според правилникот се пренесуваат три бода. Исто толку бодови во оваа фаза ќе има и Вардар 1961 кој заврши како прв во Групата „Б“.

Останати учесници во плеј-офот се ГРК Охрид, Еурофарм Пелистер (пренесуваат по 2 бода), ГРК Тиквеш, Бутел Скопје (пренесуваат по 1 бод), Пролет 62 и Струга (не пренесуваат бодови). Плеј-офот стартува во февруари, а ќе се игра до јуни. Прв предизвик за РК Алкалоид во плеј-офот ќе биде тимот на Пролет 62. Натпреварот е закажан на 10.02. (сабота) со почеток од 16:00 часот во салата „Македонско Сонце“ во Скопје.

Во плеј-офот во РК Алкалоид ќе има три новини во играчкиот ростер – тоа се тројца нови играчи кои се промовирани од екипата на РК Мулти Есенс. Во нашиот клуб доаѓаат пивотот Валентин Карасманакис, десното крило Мартин Димовски и голманот Виктор Василевски.

Од екипата си замина интернационалецот Алехандро Ромеро Карерас кој настапуваше на голманската позиција, додека пивотот Стефан Стојчевиќ од РК Алкалоид е испратен во РК Мулти Есенс.

РАСПОРЕД НА НАТПРЕВАРИ ВО ПЛЕЈ-ОФОТ

1. коло: РК Пролет 62 – РК Алкалоид
2. коло: РК Алкалоид – ГРК Тиквеш
3. коло: РК Струга – РК Алкалоид
4. коло: ГРК Охрид – РК Алкалоид
5. коло: РК Алкалоид – РК Вардар 1961
6. коло: РК Бутел Скопје – РК Алкалоид
7. коло: РК Алкалоид – РК Еурофарм Пелистер
8. коло: РК Алкалоид – РК Пролет 62
9. коло: ГРК Тиквеш – РК Алкалоид
10. коло: РК Алкалоид – РК Струга
11. коло: РК Алкалоид – ГРК Охрид
12. коло: РК Вардар 1961 – РК Алкалоид
13. коло: РК Алкалоид – РК Бутел Скопје
14. коло: РК Еурофарм Пелистер – РК Алкалоид

Почна продажбата на билети за натпреварот РК Алкалоид – РК Логроњо Ла Риоха кој ќе се игра во рамките на шестото коло од Европската лига на EHF на 05.12.2023 (вторник) со почеток од 18:45 ч.

Продажбата на билети за натпреварот меѓу РК Алкалоид и РК Логроњо Ла Риоха од Шпанија ќе се одвива преку продажната мрежа на MKTickets:
https://mktickets.mk/event/alklar/

Цената на влезниците за дуелот кој ќе се игра во СЦ „Јане Сандански“ во Скопје изнесува 100 и 150 денари. Блоковите 1, 2, 9 и 10 се по цена од 100 денари, додека, пак, билетите за блоковите 3, 4, 7, 8, 11, 12, 15 и 16 чинат 150 денари.

Екипите на РК Алкалоид и РК Мулти Есенс на ждрепка во Ракометната федерација на Македонија (РФМ) ги добија противниците за елиминацискиот натпревар од Куп на Македонија.

РК Алкалоид на гостински терен ќе игра со екипата на РК Драчево од Скопје, а екипата на РК Мулти Есенс на гостински терен ќе игра со екипата на РК Бисинов Фрут Ленд од Велес.

Натпреварите е предвидено да се играат на 9/10 декември 2023.

Нашиот РК Алкалоид ги заврши гостинските натпревари во Европската лига на ЕХФ во натпревар со РК Војводина во Нови Сад (29-34). По средбата во салата „Слана Бара“, тренерот Кирил Лазаров направи осврт и ја коментира средбата со српскиот шампион.

„Видовме еден борбен натпревар од страна на двете екипи. Војводина е искусен и квалитетен состав, тоа го докажа на овој меч. Секогаш воведуваат нешто ново во играта, имаат квалитетни играчи и тешко е да се игра против ваков тим, посебно кога имаш млад состав како што е нашиот. Ние учиме од сите овие натпревари и собираме искуство“, изјави Лазаров.

Во име на екипата говореше и Марко Митев.

„Ова беше одличен натпревар за двете екипи. Ние ги пропуштивме нашите шанси на овој меч, меѓутоа игравме против силен и квалитетен противник и од вакви натпревари и екипи можеме само да научиме и да собереме искуство. Мора да се подобриме, да бидеме посконцентрирани, ако сакаме во иднина да имаме резултати и против поискусни екипи од нас“, изјави Митев.

РК Алкалоид за крај на групната фаза во дебитантската сезона во Европската лига на ЕХФ го чека домашен натпревар против шпанска Логроњо Ла Риоха, против која на гости го освоивме првиот европски бод.

РК ВОЈВОДИНА – РК АЛКАЛОИД 34-29 (16-11)
Сала: „Слана бара“ во Нови Сад. Судии: Емил Агакиши и Ернест Агакиши од Азербејџан. Делегат: Емир Бешлија од Ц. Гора
РК ВОЈВОДИНА: Лучин, Трнавац (18 одб), Шијан 1, Воркапиќ 7, Вуковљак, Азиз 9, Ратковиќ, Миленковиќ, Сунајко 1, Пушица, Раѓеновиќ 1, Пешиќ, Томиќ, Роган 2, Голубовиќ 6, Пуховски 7
Седмерци: 2/2 Исклучувања: 6 мин
РК АЛКАЛОИД: Трајкоски (8 одб), Галевски (2 одб), Џонов 3, Маркоски 1, Младеновиќ, Серафимов 8, Стојчевиќ, Стојковиќ 5, М. Митев 6, Ѓоргиев 1, Велковски, Омерагиќ, Бинго 1, Кофилоски, Д. Митев, Савревски 4
Седмерци: 4/5 Исклучувања: 2 мин.

РК Алкалоид го одигра последниот меч на гостински терен во EHF Европската лига. Нашиот тим во рамките на петтото коло гостуваше во Нови Сад, кај првакот на Србија, екипата на РК Војводина.
Бодовите ги освои домашната екипа (34-29) и со тоа обезбеди пласман во Главната рунда на натпревари. РК Алкалоид, пак, има уште еден меч пред да ја заврши својата прва европска сезона. Во следното коло, на петти декември во Скопје ќе гостува екипата на Ла Риоха Логроњо од Шпанија.

Вечерва во Нови Сад, екипата на РК Војводина беше поснаодливиот противник. Поведоа домашните со 6-3 во деветтата минута користејќи неколку промашувања и две технички грешки на нашиот тим.

РК Алкалоид имаше два обида да стигне на минимална негатива во овој период од мечот и успеа во 15 минута да намали на 6-7. Имавме веднаш потоа и напад за израмнување, но успеа да одбрани противничкиот голман, по што се наруши нашиот напаѓачки ритам и српскиот тим одново да дојде во покомотна позиција (11-7). До крајот на првиот дел РК Алкалоид имаше неколку шанси да ја заврши оваа делница со помала негатива, но одново не реазлизиравме од изградени ситуации и РК Војводина по првиот дел имаше предност од 16-11.

Во второто полувреме Алкалоид бркаше негатива, но Војводина мудро ја држеше предноста. По десет минути игра беше 25-20, потоа и 27-22, позитива на српскиот тим која беше недостижна во последните минути од мечот за нашата екипа затоа што во еден момент стана и 31-24.

ЛОГРОЊО ЛА РИОХА – РК АЛКАЛОИД 29-29 (18-15)

Спортска сала „Ла Риоха“ во Логроњо, Шпанија. Судии: Иварс Чернавскис и Едмундс Богдановс од Летонија. Делегат: Марко Бранди од Италија

ЛОГРОЊО ЛА РИОХА: Солер 2, Пресиадо 7, Фернандез 4, Понсиано, Заја 3, Туа 2, Уриос 3, Ортиз, Паласич, Д. Кадарсо 4, Паломино 3, Е. Кадарсо 1, Абделмоталеб
Седмерци: 2/2 Исклучувања: 4 мин.

АЛКАЛОИД: Ромеро, Трајкоски, Џонов 6, Маркоски 2 Младеновиќ, Серафимов 3, Стојчевиќ, Стојковиќ 2, М. Митев 2, Ѓоргиев, Велковски 4, Омерагиќ, Бинго 7, Петковски 3, Д. Митев, Савревски
Седмерци: 1/1 Исклучувања: 6 мин.

РК Алкалоид натпреварот го почна помалку во грч, со промашени шутеви и технички грешки по кои домашниот состав успеа да воспостави контрола и да поведе со 4-1. Арно Бинго беше голгетерски расположен и додека да одмине првата криза го одржуваше тимот во игра. Потоа се ослободи Алкалоид од грчот, почнаа да погодуваат и други ракометари и по 14 минути игра беше 7-7.

Но, имаше висок процент на реализација домашниот тим и успеваше да ја задржи предноста, иако Алкалоид секогаш беше блиску, само на чекор заостанување. Но, кога и да бевме во позиција да израмниме ќе се случеше техничка грешка или голманска одбрана и Ла Риоха остана во водство до крајот на полувремето, а со последниот гол успеа да го врати највисокото водство од три гола (18-15).

На стартот на второто полувреме меѓу стативите во ритам влезе Благојче Трајковски. Благодарение на нашиот голман РК Алкалоид влезе и во гол-серија и со пет погодока го сврте мечот од 20-16, на 20-21. Оттогаш, дуелот во Шпанија беше вистинска игра на нерви. РК Алкалоид во повеќе наврати имаше шанса да избега на плус два, но неискуството го плати скапо, со нереализирани напади.

Ла Риоха тоа го казни со позитива од 27-25 на седум минути до крајот, но Трајковски пак влезе во елемент, фати два зицери на противникот и со шестиот гол на Џонов се влезе во неизвесна завршница (28-28). Во последната акција на мечот, крилото Петковски погоди за реми и прв историски бод на нашиот тим.

Изјави по натпреварот:

АРНО БИНГО: „Не е лесно за младите играчи во нашиот тим да играат против екипи кои имаат многу побогато искуство и многу учества во Европа. Затоа, мислам дека ова е добар резултат за клубот. Но, од друга страна, знам и дека можеме многу повеќе“

ИВАН ЏОНОВ: „Нерешениот резултат е добар, но имавме добра шанса да ги освоиме двата бода. Ни падна концентрацијата. Имавме во еден период неколку нереализирани напади во серија. И тие грешеа и промашуваа, но ако ги искористевме нашите шанси, ќе можевме до победа. Задоволни сме со нерешениот резултат, но нема да застанеме на ова. На секој следен натпревар ќе одиме со амбиција да победиме“