РК АЛКАЛОИД – ССВ БРИКСЕН 38-31 (19-20)
Сала: „Автокоманда“ во Скопје. Судии: Иварс Чернавскис и Едмундс Богдановс од Летонија. ЕХФ делегат: Дељан Генчев од Бугарија
РК АЛКАЛОИД: Кизиќ (9 одб +1), Галевски (7 одб), Џонов 1, Маркоски, Серафимов 2, Карасманакис 2, Стојковиќ 4, М. Митев 7, Ѓоргиев 2, Велковски 1, Ивановски 2, Бинго 5, Франциско 2, Петковски 8, Д. Митев 1, Савревски 1
Седмерци: 1/1 Исклучувања: 2 мин
ССВ БРИКСЕН: Лубинати, Вуливач, Аѕолин 1, Дела Векија 3, Арциери 4, Винисиус 12, Кањете 4, Е. Ибаљи 2, А. Ибаљи 1, Садер, Башиќ 3, Милхогер, Социо, Оберхолензер 1
Седмерци: 2/3 Исклучувања: 4 мин.

РК Алкалоид е меѓу најдобрите осум екипи во ЕХФ Европскиот куп. Нашиот тим беше подобар во двомечот со италијанската екипа Бриксен и во вторник ќе биде дел од ждрепката за 1/4 финалето на ова европско натпреварување.
Натпреварот во Скопје се играше во побавен ритам од тој во Италија, но имаше многу погодоци, затоа што немаше многу силни стартови во одбраната, па напаѓачките формации дојдоа до поголем израз.

Во првите 10 минути од средбата темпото и резултатот го диктираше РК Алкалоид, но свој период имаа и гостите кои успеаја да израмнат и да поведат по десет минути игра (7-6). РК Алкалоид се врати во предност, стигна и до плус три гола (14-11), но гостинскиот состав покажа карактер и одлучност и искористи неколку грешки, па направи целосен пресврт и во 28 минута имаше водство од 20-17. По ова РК Алкалоид одново го засили ритамот и во последниот напад од полувреме бркаше нерешено, но немаше доволно време. На одмор се замина со гол предност за гостинскиот тим (20-19).

РК Алкалоид со изменет и поангажаиран пристап го почна вториот дел и по 10 минути игра имаше предност од четири гола (27-23), а во 43 минута водеше и со седум гола (30-23). До крајот беше рутинско одработување, но во допадлив стил, со брза игра и убави погодоци.

РК Алкалоид следната недела ќе биде во ждрепката за 1/4 финалето на ЕХФ Европскиот Куп.

РК Алкалоид се насочува кон новиот европски предизвик во EHF Европската лига каде нашиот тим е пред портите на четврт-финалето. Ни следи реваншот со италијанскиот клуб РК Бриксен, против кого славевме со високи 12 гола разлика на првата меѓусебна средба во Италија.

Како увертира на вториот меѓусебен меч кој ќе се игра во Скопје, РК Алкалоид одржа прес-конференција на која пред медиумите говореше тренерот Кирил Лазаров. Нашиот стратег ќе ги има сите посакувани играчи на располагање, а амбициите се секогаш високи – да се победува.

„За мене малку неочекувано во овој период на годината, дојдовме до висока и убедлива победа прротив квалитетен ривал од Италиа. Знаеме дека нивниот ракомет е во подем како репрезентативен така и клупски, така што високата гол-разлика е неочекувана. Одигравме еден квалитетен меч, ни одеше се од рака и резултатот од Италија не е реален. Се одлепивме во последните минути, во 50 минута беше само четири гола предност, па така нема да го потцениме ривалот, иако можам да кажам дека сме поквалитетен противник од нив. Ракометарите одиграа одлично, ни следува реванш во Скопје, со истиот противник. Сакам и очекувам да победиме, заради нашиот рејтинг и македонскиот ракомет. Доста добро се подготвивме за овој натпревар и спремни ќе го дочекаме натпреварот против Бриксен.

Искуството ми вели дека треба да се фокусираме на секој следен противник, така што сега ни е Бриксен од Италија. Распоредот е таков и мораме да го прифатиме овој предизвик. Знаеме дека против Еурофарм Пелистер ни следи меч, но мора да одиграме максимално со секого. Се уште немаме одлучено како ќе играме. Ќе видиме како ќе не води мечот, така ќе се однесуваме во сабота. Со мислите ќе бидеме во Битола, но мора прво да си ја завршиме задачата. Не сакам да дојде до некои непромислени работи со кои би ја загубиле самодовербата.
Доста разговараме на таа тема, затоа што имаме голема предност. Посакуваме да добиеме понеатрактивен ривал, во еден сад мислам дека има понеквалитетни ривали, иако сите што се во ТОП-8 се квалитетни и на високо ниво, од нивото на Европската лига на ЕХФ.“, изјави Лазаров.

Во име на РК Алкалоид пред новинарите зборуваше и десниот бек Мартин Велковски, кој по одличното Светско првенство со Македонија целосно му се стави на располагање на клубот и продолжи да игра во ист ритам.

„Пред нас е реванш со вицешампионот на Италија. Резултатот на крајот беше со висока разлика, но не беше така текот на мечот. Ривалот игра модерен и брз ракомет, но ние сме поквалитетни, можеме да дојдеме до уште една победа. Ја повикувам публиката да не бодри и заеднички да го славиме пласманот во четвртфиналето. Мечот во Италија имаше многу голови затоа што се играше со високо темпо. Тешко е да се игра и поквалитетна одбрана со мислата да има повеќе голови. Мислам дека и овој меч во Скопје ќе биде во исто темпо како оној во Италија и ќе има повеќе голови““, изјави Велковски.

За РК Алкалоид, мечот против РК Бриксен во Скопје ќе биде шести во еврокуповите оваа сезона. Во рамки на EHF Европскиот куп, покрај што нашиот клуб победи во Италија со 44:32, во претходните двомечи со по две победи бевме подобри од РК Вест Виена од Австрија (38:27 и 32:29) и РК Драгунас Клаипеда од Литванија (42:31 и 37:31).

Натпреварот меѓу РК Алкалоид и РК Бриксен се игра во сабота со почеток од 18:00 часот во салата „Автокоманда“.

РК АЛКАЛОИД – РК ФРУИТЛЕНД БОРЕЦ 42-30 (23-16)

Сала: „Автокоманда“ во Скопје. Судии: Иво Георгиевски и Игор Наумовски. Делегат: Камер Металари
РК АЛКАЛОИД: Кизиќ, Трајковски (15 одб), Џонов 4, Петров, Карасманакис 3, Стојковиќ 2, М. Митев, Велковски, Ивановски 11, Бинго 4, Франциско 2, Петковски 4, Д. Митев 5, Савревски 4, Гарбески 3, Наковски
Седмерци: 4/5 Исклучувања: 2 мин.

РК ФРУИТЛЕНД БОРЕЦ: Солев (17 одб), Димов, Стојановски 4, Трајковски 2, Трифуновски 7, Ивчевски, Иванов, Черубим 3, Димитров, Петров 1, Табаков 1, Миланов 6, Цвитановиќ 3, Стојменов 2, Павлов 1, Митревски (2 одб)
​Седмерци: 3/4 Исклучувања: 12 мин.

РК Алкалоид ја запиша својата 17 првенствена победа и останува осамен на првото место на Суперлигашката табела и по вечерашниот натпревар со РК Фруитленд Борец.

РК Алкалоид запиша сигурна победа над велешкиот состав со 12 гола разлика на натпревар на кој тренерот Кирил Лазаров поголема шанса им даде на ракометарите кои не беа дел од екипата што патуваше во Италија, а меѓу нив и на двајца ракометари од подмладокот, Максим Гарбески и Антонио Наковски.

Немаше поголеми резултатски проблеми и за ваков комбиниран состав. Поведе Алкалоид со 6-3 и до 10-5 и имаше комплетна резултатска контрола до крајот на првиот дел што заврши со резултат 23-16.

Сличен беше ритамот на игра и изборот на играчи и во второто полувреме. РК Алкалоид го контролираше резултатот, а гостите од Велес пружија отпор, долго време се одржуваа под линијата од 10 гола, иако на крајот РК Алкалоид влезе во уште една серија и запиша победа со поубедлива разлика.

Новиот играч, Мартин Ивановски, постигна 11 погодоци и за прв пат стана најдобар стрелец на тимот на првенствен натпревар. Дамјан Митев постигна пет погодоци, а голманот Трајкоски имаше 15 интервенции.

Следниот натпревар за РК Алкалоид е одново европски. Во сабота во Скопје ќе играме против ССВ Бриксен за заверка на пласманот во 1/4 финалето на ЕХФ Европскиот Куп, а потоа во првенството продолжува со дерби меч против РК Еурофарм Пелистер што ќе се игра во Битола.

РК Алкалоид го одигра својот прв натпревар од 1/8 финалето на ЕХФ Европскиот Куп. На гостински терен запипа убедлива победа од 12 гола разлика (44-32) и вратите од 1/4 финалето се веќе отворени, но остануваат да се одиграа уште 60 минути против Бриксен.

Ракометарите беа видно задоволни од настапот, играта и резултатот, но подвлекуваат дека нема да има опуштање пред реваншот што следниот викенд ќе се игра во „Автокоманда“.

ИВАН ГАЛЕВСКИ

„Без разлика кој и да е противник, ние максимално се спремаме, го даваме максимумот. Така беше и сега, заслужено победивме со Бриксен. Го реализиравме нашиот план со стручниот штаб и дојдовме до висоска победа. Ние, сепак, максимално ќе влеземе сериозно и на следниот меч во Скопје, затоа што ни следи малку понапорна недела во која ни следат домашни мечеви, прво со Фруитленд Борец, потоа со Еурофарм Пелистер. Бриксен никако не е за потценување, имаат одлични шутери кои добро шутираат од девет метри, полетни крила кои цело време влечат брз центар, но мислам дека нашата физичка спремност победи во овој момент и можеби бевме пофизички моќни со подобра ротација и бевме исто така подобри тркачки, затоа што ривалот ги користеше истите играчи во поголемиот дел“

МАРКО КИЗИЌ

„Противникот не беше наивен, ни требаше време да го скршиме отпорот и да отидеме на висока разлика. Најважно од се е што држевме еден ритам целите 60 минути. Бриксен се носеше со нас до пред крајот на мечот. Беше упорен како тим, се враќаше цело време, ама ние бевме поупорни и поквалитетни. Реваншот исто така ќе го сфатиме сериозно, не смееш да се опуштиш, пред се поради себе. Нема да се лажеме и да кажеме дека не знаеме што значи оваа предност, ама и на реваншот ќе одиме на победа, тоа е нашата цел“

МАРТИН ИВАНОВСКИ:

„Одлично се снаоѓам во Алкалоид. Како што кажаа сите, така и се покажа дека е – клубот е на професионално ниво. Соиграчите, управата, стручниот штаб ме примија најдобро. Многу сум задоволен од професионализмот на секој член на клубот. За мене ова беше европско деби во Алкалоид, дадов два гола, задоволен сум, ама не треба тука да застанеме. Како екипа имаме голем потенцијал и се надевам дека тој ќе излезе на површина преку напорна работа“

ФРАНЦИСКО Е СИЛВА:

„Натпреварот беше доста добар за нас, доста тежок затоа што моравме многу да трчаме, но успеавме да се одлепиме уште во воведните минути и држевме темпо. Не очекував толку брз ритам на еден дуел, нормално дека ги гледавме, анализиравме, но друго е во живо. Бриксен се покажа како доста брз тим.
На следниот меч очекувам пак да победиме, за тоа и работиме. Имаме појасна слика за ривалот. Ќе се обидеме да бидеме уште подобри, посебно во одбрана каде сакаме да примиме помалку голови.
Даваме 100% од себе на секој меч, Лазаров се обидува да го промени стилот на игра што се игра во првенството, наметнува поинаков стил на игра. Со себе носи големо искуство кое може да ни го даде и не учи на секој тренинг. Задоволен сум како течат работите и се надевам ќе бидеме уште подобри во иднина“, вели Франциско е Силва.

ССВ БРИКСЕН – РК АЛКАЛОИД 32-44 (18-23)

Сала: „Јужен Бриксен“ во Бриксен, Италија. Судии: Ивс Шолс од Холандија и Стефен Мартен од Белгија. Делегат: Борис Вукашиновиќ од Србија
ССВ БРИКСЕН: Вуловач, Аѕолин 3, Дела Векија 1, Арциери 7, Винисиус 8, Кањете 4, Е. Ибаљи 1, А. Ибаљи 3, Садер 1, Башиќ 4, Милогер, Пунтајер, Социо, Оберхолензер, Лубинати

Седмерци: 5/8 Исклучувања: 6 мин.

РК АЛКАЛОИД: Кизиќ (12 одб), Галевски (2 сед.+ 6 одб), Џонов, Маркоски, Младеновиќ 1, Серафимов 6, Карасманакис 2, Стојковиќ, Митев 7, Ѓоргиев 7, Велковски 4, Ивановски 2, Бинго 4, Франциско 4, Петковски 6, Савревски 1

Седмерци: 1/1 Исклучувања: 6 мин.

РК Алкалоид е чекор поблиску до 1/4 финалето на ЕХФ Европскиот Куп откако вечерва во Италија го совлада домашниот тим ССВ Бриксен со убедливи 12 гола разлика.

Бодрен од поголема група на македонски навивачи од дијаспората кои дојдоа со цел арсенал на навивачки реквизити, РК Алкалоид натпреварот го почна импресивно, со водство од 5-0. За таквиот старт одбраната беше важен фактор, но и добро анализираната игра на противиникот за која РК Алкалоид имаше решенија.

Средбата се играше во брз ритам и тоа носеше и грешки на двете страни, но резултатската разлика не беше доведена во опасност во првиот дел. Алкалоид ги казнуваше грешките на противникот со контра-напади или голови од брза транзција во што предничеа Бинго и Петковски, а во позициските напади Марко Митев беше предводникот, Мартин Велковски одигра одлично полувреме, добра партија пружи и Франциско Е Силва.

Поддршката од голманите не изостана, Кизиќ имаше осум интервенции, а Галевски ги одбрани и двата пенала досудени за домашниот тим.

Во уште побрз ритам се играше во вториот дел. Алкалоид поведе со 26-19, но домашните со сите сили се обидуваа да намалат. Игор Ѓоргиев имаше одличен период, а тренерот Лазаров во ротацијата шанса им даде на сите ракометари.
Како минуваше времето, така Алкалоид стануваше сѐ посигурен. Добро распоредените сили во финишот на мечот му донесоа голема предност на сино-белиот состав. Се разиграа повеќе играчи, предноста стана двоцифрена и за конечно средбата да заврши со победа од 44-32.

Ракометарите на Алкалоид заедно со македонските фанови кои се симнаа на теренот ја прославија оваа голема победа. Реваншот на кој треба да биде заверен пласманот во 1/4 финалето ќе се игра следната недела во Скопје.

РК Алкалоид вечерва почнува нова епизода во својата европска клупска историја. РК Алкалоид во 1/8 финалето на ЕХФ Европскиот Куп, вечерва во салата „Јужен Бриксен“ ќе се сретне со домашниот ССВ Бриксен на првиот од двата дуела што ќе го дадат патникот во 1/4 финалето.
Тренерот Кирил Лазаров имаше доволно време и материјали за да ја подготви екипата за вечерашната прва средба, а од тоа што беше видено и анализирано, заклучокот е дека противникот е сериозен тим. Во нивниот состав има неколку странски ракометари кои се и носители на играта, а Италијанците главно се играчите од ротацијата. Не користат многу играчи, но играат со брза транзиција и можат да го издржат темпото.

„Се подготвувавме речиси цела недела за овој меч. Очекувам триумф, иако нема да биде лесно затоа што Бриксен е искусна екипа во која има седум до осум играчи кои играат скоро цела средба. Исто така се и доста брзи, даваат над 30 гола, па би требало да ни следи доста брз меч во висок ритам, тежок за играње.

Наша предност е што имаме поширок ростер, не е лесно да се трча цел натпревар, ама од друга Бриксен на досегашните натпревари го издржа тоа темпо. Не би можел точно да ја споредам некоја наша екипа, но според видео анализата што ја направивме, би рекол дека Бриксен е екипа што е од рангот на пример на Охрид. Но, тоа и не мора ништо да значи, заклучокот е од гледање на видео, а тоа не ја преставува реалноста и нивните можности на теренот“, вели Марко Митев.

Игор Ѓоргиев го дели мислењето со Марко Митев и тренерот Лазаров. Очекува тежок натпревар, против тим што не смее да биде потценет.

„Имавме доста време да се подготвиме за Бриксен, се работи за полетна екипа која трча добро во два правци. Нѐ чека тешка борба на двата меча, посебно во тој тркачки дел. Најголемата нивна опасност доаѓа од пивотот и двата бека кои се интернационалци од Бразил и од Аргентина, плус имаат уште неколку странски ракометари во екипата. Сепак, мислам дека добро ги анализиравме, очекувам добар меч и секако наши победи и потоа пласман во следната рунда“, изјави Игор Ѓоргиев.