Новата, трета по ред европска сезона за РК Алкалоид почнува викендов со првиот дуел од двомечот за пласман во групната фаза на ЕХФ Европската лига. Противник на РК Алкалоид во овој двомеч е тимот со највисокиот рејтинг меѓу екипите што играат во квалификациската фаза – ТСВ Хановер Бургдорф или Die Recken (Воини), еден од најсилните германски клубови во последните неколку сезони.

Првиот натпревар ќе се игра на 31 август (недела, 17:00ч.) во Хановер, а реванш натпреварот е закажан на 6 септември во Скопје, во салата „Автокоманда“ со почеток од 19:30 часот.

ТСВ Хановер-Бургдорф е клуб кој датира од 1922 година под називот ФТ Бургдорф. Клубот мина низ неколку трансформации во својата историја, за конечно, по повеќе од 80 години подоцна, во 2005 година тогашниот ТСВ Бургдорф да стане ТСВ Хановер- Бургдорф и оттогаш своите натпревари ги игра во Хановер.

Првиот пласман во најсилното германско натпреварување го обезбеди во сезоната 2009/2010, а во вистински резултатски подем ужива во последниве четири-пет години. Во овој период се финансиски стабилни и составија екипа која игра важна улога во најсилната лига во светот.

Минатата сезона беше најдобрата за клубот во неговата историја, а за прв пат теоретски беа во игра и за шампионски пехар. По дваесетина кола беа на врвот на табелата, но не го издржаа докрај ритамот на Бундеслигата. Нивниот резултатски пад почна во последните десет натпревари во кои победија само двапати, еднаш ремизираа и запишаа повеќе порази отколку во текот на целата сезона. Но и покрај тоа завршија на шестото место со само три бода помалку од еден многу попознат тим – СГ Флензбург – Хандевит.

ТСВ Хановер Бургдорф резултатската преродба ја почна под водство на поранешниот селектор на Германија, Кристијан Прокоп, кој дојде во клубот во 2021 година. Го стабилизираше составот, доведе важни ракометари, според неговата визија клубот ја адаптираше својата развојна стратегија и веќе имаат забележителни резултати. Стилот на игра им е препознатлив, во одбрана играат подлабока 6-0 зона во која добро изолираат, се движат и антиципираат. ТСВ Хановер-Бургдорф е препознатлив во Бундеслигата и по брзината на транзицијата што не запира во текот на целиот натпревар, без оглед на резултатот.

ТСВ Хановер Бургдорф бундеслигашките дерби натпревари ги игра во „ЦАГ“ Арена во Хановер која за такви прилики редовно се полни со 11.000 гледачи. Натпреварот со РК Алкалоид ќе го игра во помалата, „Свис Лајф“ Арена која има капацитет од 4.500 гледачи.

ТСВ ХАНОВЕР БУРГДОРФ

Голмани: Симон Гаде (Данска), Жоел Бирлем (Германија)
Леви крила: Аугуст Педерсен (Норвешка), Ханес Феис (Германија)
Леви бекови: Максим Орлов (Германија), Лукас Штуцке (Германија)
Средни бекови: Мариан Михалчик (Германија), Јонатан Едвардсон (Шведска), Лиф Тисие (Германија), Синдре Ахо (Норвешка)
Десни бекови: Вилхелм Пулсен (Ф. Острови), Рејнарс Усчинс (Германија)
Десни крила: Мариус Стенхаузер (Германија), Даниел Вебер
Пивоти: Јустус Фишер (Германија), Томас Солстад (Норвешка), Луис Родригез (Германија)
Тренер: Кристијан Прокоп

Дојдоа: Лиф Тисие (Хамбург), Аугуст Педерсен (Флензбург), Максим Орлов (Потсдам), Синдре Ахо (Монпеље)

Заминаа: Тилен Стрмљан (ГРК Охрид), Мартин Хане (Гепинген), Владислав Кулеш (Мелзунген), Адам Нујфал (Лемго), Корај Ајар (Бешикташ), Винсен Бахнер (Ајзенах), Максимилијан Гербл (крај на кариера)

Дамјан Митев минатата сезона доби една од главните улоги и екипата се потпираше на него во најважните натпревари, особено на европската сцена. Испитот успешно го положи и во следната сезона влегува со поголемо искуство и самодоверба во систем на игра што веќе добро го познава.
Предизвиците ќе бидат поголеми и потешки, но РК Алкалоид одамна го има одбрано својот пат.

„Подготовките течат на највисоко ниво. Задоволен сум многу од екипата, имаме добра хемија, се бориме еден за друг. И оваа нова сезона нѐ чека тежок предизвик. Во Европската лига ќе играме двомеч со Хановер, а почнуваме на 31 август на гостински терен. Станува збор за тежок ривал, екипа од Бундеслигата, но ќе се бориме и нема да се откажеме. Потоа следува реваншот во Скопје и ќе треба да се покажеме во најдобро светло пред нашата публика.
Оваа година Суперлигата ќе биде една од посилните и поквалитетна од претходните сезони. Ќе се бориме, очекуваме високи резултати“, изјави Дамјан Митев

Емилјан Ѓорговски големиот македонски потенцијал сезонава му се приклучи на семејството на РК Алкалоид и во сино-белиот дрес ќе ја бара шансата за ново играчко докажување, а екипата добива ракометар кој треба да донесе нови опции во играта имајќи ги предвид неговите шутерски способности. Ѓорговски веќе има играно заедно со дел од новите соиграчи што позитивно влијае на неговата брза адаптација и вклопување во составот.

За подготовките…

„Презадоволен сум како сум прифатен од новите соиграчи. Подготовките течат во најдобар ред, се трудам да го дадам својот максимум на секој тренинг, а потоа и на терен. Атмосферата е одлична, со дел од играчите имаме играно заедно во младинската репрезентација, па не беше тешко да се вклопам во тимот.

За Суперлигата…

„Од сезона во сезона Супер-лигата е поквалитетна, има поголема конкуренција. Покрај Вардар, Пелистер и Алкалоид, сезонава засилен е и Охрид. Но, секогаш има и по некое изненадување плус, не смее да се потцени ниту еден тим. Наша задача ќе биде максимално да се подготвиме за секој натпревар без разлика против кого играме.
Со оглед на тоа дека сите репрезентативци играат во домашната лига, а квалитетот е на високо ниво, тоа е добро и за националниот тим“.

ЗА ЕХФ Европската лига…

„Секогаш одиме на победа, дури и против еден бундес-лигаш како што е Хановер. Знаеме дека Бундес-лигата е најдобра во светот, но секогаш одиме максимално“, изјави Емилијан Ѓорговски.

Никола Костески (32) во новата сезона ќе биде еден од најискусните играчи во составот на РК Алкалоид. Крилото е во специјална фаза на подготовки во Маврово, каде полека се враќа во ритам по повредата која ја доживеа лани. Работи заедно со Марко Митев, под будното око на физиотерапевтот Тоше Трајковски, а низ рехабилитацискиот процес вози и велосипед.

Околу тренинзите со РК Алкалоид…

„Се подготвуваме во фаза со физиотерапевтот Тоше Трајковски, тој го води рехабилитацискиот процес за враќање на мускулот. Се чувствувам добро, се надевам дека ќе биде се како што треба. Тренираме заедно со Марко Митев за да ја вратиме формата, под специјална програма и со велосипеди.“

За целите и настапот во Европа…

„За нашата екипа може да кажам дека сме добро склопени, со засилен ростер и имаме поставени цели кои се високи. Моментална пречка во Европа ни е Хановер, тоа ќе бидат наши две први официјални средби. Сигурно дека го добивме можеби најтешкиот ривал, но ќе се надигруваме. Нема да потклекнеме пред ривалот, иако Хановер е бундеслигаш кој беше прво место во поголемиот дел од сезоната.“

За македонскиот шампионат…

„Моментално, ако согледаме одблизу македонската лига е на највисоко ниво, оваа година сме четири до пет квалитетни екипи во битка за горниот дел на табелата. Нашите цели секако се највисоки и во лигата и во Купот, така што ќе играме против секого.“

За шансата првпат да ја дели соблекувалната со братот Ненад Костески во еден клуб…

„Прекрасно е да се игра заедно и сум пресреќен, како постар сум тука да го советувам за се што треба, со цел да имаме подобар квалитет и да стигнеме до целта и да се креваме како играчи и тим. Бевме со него заедно во репрезентацијата во еден момент, а сега првпат сме заедно во клуб. Имаме ова година квалитетен ростер на играчи, а пред нас е тешка и долга сезона.“

Михаил Аларов е едно од новите имиња во тимот на РК Алкалоид. На 27-годишникот кој игра на позицијата пивот не му беше потребно многу време да се адаптира на новата средина, затоа што ќе ја дели соблекувалната со познати лица. Подготовките течат во најдобар ред, целите се високи, но прогнози предвреме нема, вели Аларов.

„Работиме доста напорно, имаме доволно време да ја темпираме формата според желбите на тренерот Лазаров и добро да се спремиме за тешката сезона, која сигурно ќе биде највозбудливата досега. Ќе имаме и тежок противник во Европа, но ние како играчи даваме максимум секој ден, екипата е сложна, полека се подготвуваме за нашите цели кои сакаме да ги оствариме и исполниме.

Во РК Алкалоид се вклопив одлично затоа што играчите ги познавам од порано, условите за работа се одлични и професионални и немам никакви забелешки. Околу очекувањата за она кое ни следи, не сум човек кој сака да говори предвреме за трофеи, туку само да работиме и да градиме резултати. Целите секако дека се високи, имаме желба да играме и групи во Европската лига на ЕХФ, а дали ќе успееме, времето ќе покаже. Наше е да работиме“, изјави Аларов.

И во новата сезона, едно од имињата кое ќе биде задолжено за сигурноста меѓу стативите на голот на РК Алкалоид е македонскиот репрезентативец Иван Галевски. Подготовките со клубот во Маврово течат во полн ритам, а очекувањата од сезоната и на личен и на тимски план секогаш се највисоки, согласно со амбициите на клубот.

„Повторно сме заедно, работиме напорно и сега ни следи еден подготвителен период, преку кој се подготвуваме на технички и тактички план. Знаеме дека овие тренинзи и активности малку се потешки од вообичаеното, но мора да работиме и да ги следиме задачите на тренерот за да дојдеме до посакуваното.

Работиме на сите сегменти на играта, се подготвуваме и кондициски, но мора овој ритам да го издржиме, затоа што сакаме да ја доживееме таа кулминација и да бидеме во посакуваната висока форма на крајот на месец август кога ни следи тежок старт на сезоната.

На почетокот имаме квалификации во Европската лига на ЕХФ каде ќе играме двомеч со бундеслигашот Хановер, а потоа ни следи и распоред со тешки домашни дуели во Суперлигата. Нема да биде воопшто лесно, но ние ја темпираме формата, добро ни течат подготовките, имаме добра тимска хемија. Нашите амбиции се јасни, оваа екипа е составена да победува, па така ќе одиме на победа на секој натпревар во сезоната и да го прикажеме најдоброто од нас“, изјави Галевски.