РК АЛКАЛОИД – РК ВАРДАР НЕГОТИНО 48-28 (23-14)
Сала: „Автокоманда“ во Скопје. Гледачи: 250. Судии: Исмаил Металари и Ненад Николовски. Делегат: Душко Камишевски

РК АЛКАЛОИД: Василевски, Галевски 1, Трајкоски, Џонов 4, Петров 3, Младеновиќ 1, Серафимов 2, Карасманакис 4, М. Митев, Ѓоргиев 3, Велковски 2, Бинго 8, Кофиловски 4, Д. Митев 8, Савревски 2, Димовски 6.
Седмерци: 4/5. Исклучувања: 8 мин.

РК ВАРДАР НЕГОТИНО: Кузманов 3, Орешков 3, Ацев, Бугариновиќ 1, Митевски 2, Мицев, Ѓорѓев 1, Петров 2, Адамовиќ 13, Митиќ 1, Пеовски 2, Трајанов
Седмерци: 4/4. Исклучувања: 12 мин.

РК Алкалоид го одбрани домашниот терен. Во полуфиналето од Групата 2 во Купот на Македонија нашиот тим беше сигрен против РК Вардар Неготино (48-28) и за место на Ф4-турнирот ќе игра против РК Бутел Скопје.

Избраниците на Кирил Лазаров доминираа од првата до последната секунда и заслужено запишаа победа пред нашата публика. Со добри контранапади и поддршка од голманот Иван Галевски, Алкалоид уште од почетокот се одлепи на 10-4, потоа беше и 16-10, разлика која до полувремето порасна и на девет гола (23-14).

Во второто полувреме шанса добија сите ракометари во ростерот, но победата во ниту еден наврат не беше доведена под знак прашалник. Разликата на контото на РК Алкалоид само растеше, за на крајот победата да изнесува дваесет голови разлика (48-28).

Финалниот натпревар меѓу РК Алкалоид и РК Вардар Неготино се игра утре (недела) од 18:00 часот во Спортската сала „Автокоманда“.

РК МУЛТИ ЕСЕНС – ГРК ТИКВЕШ 28-32 (14-16)
Сала: „Јасмин“ во Кавадарци. Гледачи: 150. Судии: Михајло Илиевски и Методија Илиевски. Делегат: Васил Чавдаров

РК МУЛТИ ЕСЕНС: Ермоноски, Димевски 2, Костовски 7, Мирчевски, Илиески 1, Насевски 2, Д. Узунчев 3, Петрески 4, Трајчев 1, Каракалашев, Тарчуловски 1, Трајковски, Иваноски, Тодески 2, Т. Узунчев 3, Јорданов 2.
Седмерци: 2/4. Исклучувања: 6 мин.

ГРК ТИКВЕШ: Гемаљевиќ, Анастасовски 4, Мијатовиќ 4, Темелкоски 1, Велков, Соколов, Бакев, Стефановиќ 5, Гачевиќ 2, Лазов, Манасков 5, Окардов 1, Шулески, Коцев 4, Мајиќ 5, Даневски 1.
Седмерци: 2/2. Исклучувања: 8 мин.

Нашиот РК Мулти Есенс не успеа да се пласира на Ф4-турнирот од Купот на Македонија. Тимот во финалето од Групата 1 играше со домаќинот ГРК Тиквеш и во салата „Јасмин“ не дојде до резултат доволен за завршницата (28-32).

Имаше нашиот млад тим одлично прво полувреме во кое во целост му парираше на ривалот, меѓутоа во вториот дел далеку поискусниот противник ја запиша победата на натпреварот пред својата публика. Иако губеше со 3-7, Мулти Есенс не се предаде. Влезе во серија, израмни на 8-8, потоа поведе и со 11-10, па мечот беше егал се до 12-12.

Пред финишот на првиот дел ГРК Тиквеш влезе во серија од три гола, поради тоа на паузата имаше 14-16. Во второто полувреме кавадарчани го држеа темпото на игра, а РК Мулти Есенс иако бркаше резултат, не успеа пак да се врати во мечот како што тоа претходно го направи во првото полувреме.

РК ПРИЛЕП – РК МУЛТИ ЕСЕНС 23-27 (13-15)
Сала: „Јасмин“ во Кавадарци. Гледачи: 50. Судии: Мирко Трајковски и Александар Вукашиновски. Делегат: Камер Металари

РК ПРИЛЕП: Кастратовиќ, Рајатовски, Бикоски 6, Ангелески 1, Велески, Органџиев, Бурчески 1, Лозаноски 1, Цветаноски 2, Шабановиќ, Имнадзе 1, Квастек, Трајкоски 6, Трајчевски, Ангелески, Андраде 3.
Седмерци: 2/3. Исклучувања: 12 мин.

РК МУЛТИ ЕСЕНС: Ермоноски, Димевски, Костовски 2, Мирчевски, Илиески 2, Насевски, Д. Узунчев 3, Петрески 2, Трајчев, Каракалашев, Тарчуловски 2, Трајковски, Иваноски 4, Тодески 3, Т. Узунчев, Јорданов 9.
Седмерци: 2/5. Исклучувања: 4 мин.

Екипата на РК Мулти Есенс успеа да слави над РК Прилеп (23-27) во натпревар кој се одигра во салата „Јасмин“ во Кавадарци и така се пласира во финалето од Групата 1 од Купот на Македонија. Нашиот тим за место на Ф4-турнирот ќе игра со ГРК Тиквеш кој претходно ја совлада екипата на РК Еурофарм Пелистер 2.

Екипата предводена од тренерот Миле Бочкаровски наметна свое темпо уште од почетокот. Резултатот првпат се скрши кога Иваноски стрелаше во нападот, Ермоноски фати две топки меѓу стативите и така РК Мулти Есенс замина на 4-7. Добрата длабока одбрана функционираше и во продолжението од средбата, го принудуваше противникот на грешки, меѓутоа на влезот во последните десет минути од првиот дел следеа два нереализирани пенали и напади, па така РК Прилеп дојде на 11-12.

Сепак, поради невнимателна игра противникот доби две исклучувања, па нашиот тим ја искористи бројчаната предност и замина на 13-15 на паузата. Со два гола во низа на отворањето на вториот дел, РК Мулти Есенс ја врати дотогаш највисоката позитива од четири гола (13-17) и во продолжението од мечот константно ја одржуваше, не дозволувајќи му на ривалот сериозно да се приближи во ниту еден момент.

РК Алкалоид ќе биде домаќин на дуелите од Групата 2 во Купот на Македонија, натпреварување кое е закажано на програмата пред крајот на месец март.

Ждрепката ги смести РК Алкалоид, РК Бутел Скопје, РК Вардар Неготино и РК Струга во иста група, а во полуфиналето согласно Бергеровиот систем нашиот тим вкрстува со РК Вардар Неготино. Втората полуфинална двојка ја сочинуваат РК Бутел Скопје и РК Струга.

Натпреварите од Групата 2 ќе на 23 и24 март. Сите мечеви ќе се играат во салата „Автокоманда“. РК Алкалоид првиот натпревар ќе го игра против екипата на РК Вардар Неготино во сабота (23.03.2024) со почеток од 18:00 часот.

Финалето е закажано за недела, исто така со почеток од 18:00 часот. Доколку обезбеди пласман, РК Алкалоид ќе игра со победникот од натпреварот меѓу РК Бутел Скопје и РК Струга.

РК АЛКАЛОИД – РК ВАРДАР 1961 23-27 (8-16)
Сала: „Автокоманда“ во Скопје. Гледачи: 900. Судии: Ѓорѓи Начевски и Славе Николов. Делегат: Камер Металари
РК АЛКАЛОИД: Џонов, Петров 1, Маркоски, Младеновиќ, Серафимов 8, Карасманакис, Стојковиќ, Митев 4, Ѓоргиев 2, Галевски 1, Велковски, Омерагиќ, Трајкоски 1, Бинго 3, Савревски 3, Димовски
Седмерци: 7/7 Исклучувања: 6м.

РК Вардар 1961: Богдановски, Аларов 1, Георгиевски 3, Карапалевски, Томовски, Јасихура 4, Родригез 2, Лазаревски 4, Гојковиќ, Срдановиќ 7, Николиќ 4, Ѓукиќ 2, Стојановски, Ќосевски, Мишевски, Гогов
Седмерци: 2/2 Исклучувања: 10м.

РК Алкалоид не успеа да освои бодови во дербито на колото против градскиот ривал Вардар 1961 (23-27) во рамки на плејофот од Суперлигата. Нашиот тим заостануваше од стартот, а ривалот мудро ја чуваше предноста во текот на целата средба. Мечот во салата „Автокоманда“ беше во егал до резултат 6-7, а потоа Вардар ја презеде играта. Ривалот влезе во серија, ги казни сите промашувања на нашиот тим во нападите и така се одлепи на 6-12.

До крајот на првото полувреме гостинот дојде до предност и од осум гола (8-16), а во вториот дел иако нашиот тим се обидуваше да фати приклучок не успеа во тоа и така втор меч по ред остана без бодови во разигрувањето за еврокуповите и домашната титула. Најдобар стрелец во нашиот тим беше Мартин Серафимов со осум гола, пред Марко Митев со четири реализации.

За РК Алкалоид сега следи пауза поради ЕХФ-неделата, а на обврските тимот се враќа на крајот на месец март кога се оди на гостување кај РК Бутел Скопје.

РК ГОЛДЕН АРТ – РК МУЛТИ ЕСЕНС 23-24 (16-11)

Сала: СЦ „Јане Сандански“ во Скопје. Судии: Ненад Николовски и Исмаил Металари. Контролор: Цано Куртовиќ.

РК Голден Арт: Трајковски, Христоски, Ончев 1, Глигоров, Даев 1, Шилегов 3, Јанковски, Гошевски 5, Даскаловски 1, Стојаноски 2, Миланов 1, Трајков, Милошески 7, Дрпљанин 1, Бардакоски, Гајиќ 1.
Седмерци: 2/2 Исклучувања: 14 мин.

РК МУЛТИ ЕСЕНС: Ерманоски, Димевски 10, Костовски 1, Илиески 4, Насевски, Узунчев 2, Петрески 1, Трајчев, Омерагиќ, Трајковски, Иваноски 6, Тодески, Узунчев, Трајковски, Јорданов, Стојчевиќ
Седмерци: 1/4 Исклучувања: 6 мин.

РК Мулти Есенс со блескаво второ полувреме дојде до победа против Голден Арт (24-23) во првиот меч од плеј-аутот во машката ракометна Суперлига! Нашиот тим имаше негатива од пет гола на паузата, ама со посветена игра во нападот и во одбраната дојде до важен триумф на стартот на разигрувањето за опстанок во елитното друштво во македонскиот ракомет.

Првиот меч од плеј-аутот стартува изедначено. Беше 4-4, па 5-5, потоа 7-7. Главни стрелци во нападот во таборот на РК Мулти Есенс беа Димитар Узунчев и Михаил Иваноски кои комбинираа пет гола. Разликата меѓу двата тима настана по 15. минута, кога Мулти Есенс загуби две топки во нападот, а тоа Голден Арт го надополни со два гола и замина на 8-10.

По серијата на противникот, тренерот Бочкаровски го повика првиот тајм-аут на мечот, но и тоа не помогна. Мулти Есенс против себе го имаше и расположениот искусен голман Даскалоски кој фати два пенали, па така резултатот на паузата гласеше 11-16 за РК Голден Арт. Првиот дел РК Мулти Есенс го заврши со три нереализирани седмерци (0/3).

Во воведните десетина минути од вториот дел нашиот тим беше далеку пофокусиран од ривалот и со поагресивна игра во одбраната и лесни голови израмни на 18-18, па така се врати неизвесноста на натпреварот. По нова грешка на противникот, со одличен гол од девет метри, Давид Димевски по долго време ја врати предноста за Мулти Есенс (19-18).

На самиот влез во последните десет минути, следеше нов гол на Димевски, овој пат преку цепелин, за прва позитива од два гола на мечот (23-21), Голден Арт возврати со два гола за 23-23 и следеше драматична завршница која му припадна на нашиот тим. Во клучните моменти, најважната одбрана на мечот ја забележа голманот Ѓорѓи Ерманоски, тоа беше во последниот напад на Голден Арт.