Никола Маркоски сезонава ќе биде најискусниот ракометар во РК Алкалоид, а неговото искуство и знаењето како да ја држи во строј одбранбената линија и да ги изнудува и казнува грешките на противниците во голема мерка ја обликува и играта на екипата.

„Веќе неколку години сме заедно во клубот и ги знаеме принципите по кои се работи и по кои се реализираат подготовките. Сезонава не повторивме грешки од минатото и сите ракометари ја одржуваа формата и за време на одморите, па на подготовките дојдовме спремни за процесот што ни следи.
Овој дел е многу важен за подоцна да можат да се издржат и одработат другите фази, вклучително и натпреварите што ќе ни следат. По Маврово, ќе почнеме со следната етапа, а во неа се предвидени и контролни натпревари.

Условите во Маврово се одлични, не сме прв пат овде, позната ни е средината. Екипата добро ги поднесува подготовките, амбиентот е одличен и верувам спремни ќе бидеме за предизвиците што не чекаат, првенствено во септември. Тогаш ќе играме пет важни натпревари што ќе ја обликуваат целата сезона“, изјави Никола Маркоски.

РК Алкалоид клупската база во Автокоманда ја замени со Маврово каде што го ракометарите го имаат потребниот мир и одлични услови во кои ја одработуваат втората фаза од подготовките, во која фокусот е на физичката подготовка. Петар Баснарков е асистентот на првиот тренер Кирил Лазаров, задолжен за физичката спремност на играчите.

Петар Баснарков е во клубот уште од почетокот и учествува во креирањето на принципите и системот по кој се работи. Принципи и систем кои веќе имаат форма која е препознаена од ракометарите кои ги прифатија сите нивни елементи, се прилагодија и со тоа подготовките стануваат полесни и за ракометарите и за стручниот штаб.
Баснарков вели дека е задоволен од досегашниот тек на подготовките.

За текот на подготовките…

„Ракометарите, посебно тие што се подолго време во екипата ги знаат принципите. Мене ми е ова петта сезона во клубот и запознаени се мојот начин на работа, а и јас сум запознаен со нивните перформанси.
Ние во суштина работиме и преку цело лето. Ракометарите добиваат десет дена одмор, а потоа почнуваме со работа во меѓу сезона или т.н. „off season“, што е честа пракса на пример во кошарката. Го работиме тоа така за да дојдеме во ситуација да бидеме 70-80 % спремни кога ќе стартуваат подготовките.
Тоа е битно за да се намали времето потребно за физичка подготвеност, а да се зголеми времето во кое тренерот Кире Лазаров ќе може да работи тактика. Ова е особено ни е важно сезонава, затоа што порано почнуваме со важни натпревари, па така на подготовките играчите буквално од прв ден можат да тренираат со топка“

Оценка на досегашниот дел…
„Искрено сум задоволен, секоја година е сѐ подобро. Играчите добро работеле во меѓу сезоната, дојдоа спремни. Истото се однесува и до новите играчи. Добро тренирале и во меѓу сезоната, има нормално некои ситници, но тоа се работи на навики и автоматизам што ги имале претходно. Работиме многу посветено, секој ден ни е важен и генерално сум задоволен како одат работите. Марко Митев и Никола Костески засега работат одвоено, со физиотерапевтот, а од следната недела ќе бидат заедно со другите“, вели Баснарков.

Минува првата недела исполнета со тренинзи и РК Алкалоид веќе е пред втората фаза од подготовките за претстојната сезона која ќе биде исполнета со големи предизвици уште од самиот почеток.
Марко Митев, играчот кој за кратко време ја освои ракометна Македонија со својата пожртвуваност, бескомпромисност и неспорен квалитет, новата сезона ја почнува со тренинзи дизајнирани за побрза рехабилитација и враќање на терен кое се очекува во есенскиот дел од сезоната.

За текот на подготовките…

„Во тек се подготовките за новата сезона. Секој од нас посветено работи и се подготвува за претстојната сезона. Условите за работа во РК Алкалоид, како и до сега, се врвни, исклучително професионални и се на највисоко ниво.
За тоа зборуваат и досегашните резултати и постигнувања на екипата. Стручниот тим ни е максимално посветен. Заеднички и напорно работиме сите, а секој со својот ангажман и квалитет придонесува екипата да биде максимално спремна за сезоната што ни претстои“.

За предизвиците…

„Ќе застанеме цврсто подготвени пред сите предизвици што нѐ очекуваат во новата сезона. Во тимот има одлична хемија и сплотеност, посветени сме на тренинзите и се надополнуваме еден со друг. Очекувам дека и новите играчи многу лесно ќе се вклопат во тимот и верувам дека ќе бидат одлично надополнување на сѐ она кое што можеби недостигаше изминативе сезони. Поддршката од тимот веќе ја имаат.

Очекувањата од новата сезона…

„Очекувам високи резултати бидејќи кога постои поддршка, надополнување и кога сите придонесуваат максимално, а квалитетот што го поседуваат го вложуваат несебично на терен за екипата, успехот е неминовен. Фокусот и максималните индивидуални вложувања во единствената и заедничка цел на екипата ќе и донесат високи резултати и исклучителни успеси.

Мартин Ивановски по само шест месеци во екипата забележа голем напредок и стана важен дел од колективот на РК Алкалоид. Средниот бек и во новата сезона ќе дели минутажа на плејмејкерската позиција, а во неа се влегува со високи амбиции и цели.

Очекувањата за новата сезона…

„Очекувањата за новата сезона кај сите нас се доста високи, имаме големи цели. Сакаме да оствариме највисоки успеси во Македонија, а во Европа да влеземе во групната фаза. Тие ни се првични зацртани цели за кои сите напорно ќе работиме на овие подготовки“

Како се чувствува по шест месеци во РК Алкалоид и како гледа на тимот…

„Ја завршив првата полусезона во РК Алкалоид и сум многу задоволен од брзиот напредок и од шансата која ја добив од тренерот Кирил Лазаров. Имам прилика да играм во добар клуб со големи амбиции, освоивме европски пехар и се надевам на уште една нова успешна сезона. Новите играчи кои ги добивме ќе ни донесат многу, ќе имаме доста ротација, поцврста одбрана. Ќе добиеме и на квантитет и на квалитет, што ќе биде од голема помош за нашата брза игра“

Како гледа на шампионатот на Македонија?

„Во првенството сите екипи се засилија. Очекуваме Суперлигата да биде најсилна. Ќе има борба за врвот на табелата до самиот крај и ќе биде неизвесно. Но, ние ќе се потрудиме да ги оствариме зацртаните цели, тоа се двете титули.“

За амбициите во ЕХФ Европската лига…

„Иако можеби сите посакувавме да го избегнеме Хановер, сепак, тоа не се случи. Не ни останува ништо друго освен да се подготвиме за нив. Имаме план, со добра физичка и тактичка подготовка имаме наши шанси. Сакаме да влеземе во групната фаза“

Еден од двајцата нови странски ракометари во составот на РК Алкалоид за следната сезона е брзото крило Улфар Пал Монси Тордарсон од Исланд, кој во Македонија ќе ја има првата интернационална станица. Исланѓанецот кој има 25 години во тимот доаѓа од екипата на Валур, со која минатата сезона беше меѓу најдобрите стрелци во Европската лига на ЕХФ. За исландскиот ракометар, настапите за РК Алкалоид ќе бидат прво интернационално искуство.

За првиот интернационален ангажман и новиот предизвик…

„Се чувствувам одлично и возбуден сум што сум тука. Доаѓам во нов проект, во нова земја која сака и знае ракомет. Првите впечатоци се одлични. Гледав некои натпревари на Алкалоид од минатата сезона и веќе знам како игра тимот. Се игра брз ракомет и тоа доста ми одговара на мојот профил. Генерално, сакам само да победуваме. Имаме добар состав, кој сум сигурен дека ќе ме турка и јас да бидам подобар. Тоа е мојата цел со Алкалоид за следните натпревари“

За работата со Кирил Лазаров…

„Го познавам Кирил Лазаров, големо ракометно име, тој е легенда. Возбуден сум што ќе работам со него. Сигурен сум дека може да ме научи многу за ракометната игра. Тој е модерен тренер кој сака брза игра, но знам дека ќе ме научи и некоја „олд скул“ финта на теренот и ќе ми го пренесе тој менталитет.“

За настапот во Европската лига на ЕХФ…

„Возбуден сум што повторно ќе играм во Европа. Претходно бев дел од Европската лига на ЕХФ каде имав добри партии и сега се надевам на добро претставување со Алкалоид, иако добивме незгоден ривал на ждрепката за квалификациите“

РК Алкалоид го зголемува интензитетот на тренинзи во пресрет на преселбата на планинската база на Маврово каде што во преден план ќе се работи на физичката спремност. До предвиденото заминување планирано за понеделник, ракометарите во Автокоманда фаќаат ритам на тренинзи и се прилагодуваат на работната атмосфера.
Минатата сезона брзината, колективот и транзицијата во играта беа едни од главните карактеристики на тимот. Следната сезона се очекува да биде уште „побрза“, а еден од играчите што може да го испорача тоа на терен и како крило и како бек е Иван Џонов.
Неговиот напредок е евидентен, а продолжување по нагорна траекторија е приоритет и за него и за клубот. Предизвиците ќе бидат покомплексни и потешки, а точката од каде што почнува сѐ е добрата подготвеност. Тоа е нешто на што се внимателно и планирано се работи од првиот собир.
Иван Џонов ги пренесе своите очекувања за сезоната што е претстои.

За подготовките…

„Веќе неколку дена сме во тренажен процес и подготовките почнаа да добиваат свој ритам на кој се привикнуваме. Во понеделник ќе одиме на Маврово каде што ќе ја одработиме втората фаза. Работиме многу посветено, знаеме колку е битно да се одработи квалитетно овој дел за да може екипата да ја игра својата игра и во одбрана, транзиција, напад… Максимално ќе ги искористиме тренинзите и овде и на Маврово и за физичката подготвеност и за психолошката. Понатаму, како што ќе течат подготовките ќе бидат збогатувани со повеќе детали, анализи на противници, за конечно кога ќе дојде моментот да се натпреваруваме да бидеме целосно спремни за предизвиците што ќе бидат пред нас“.

За македонската Суперлига…

„Оваа сезона би требало да биде најинтересната и најквалитетната досега. Неколку екипи имаат сериозно добри состави, многу е вложено и очекувам да биде многу неизвесно и интересно првенство до крајот. Променет е и системот на бодување што ќе го зголеми притисокот врз сите уште од почетокот на шампионатот.

ЕХФ Европската лига…
„Добивме тежок противник во квалификациите. Не треба да се трошат зборови за Хановер, екипа што е во врвот на Бундеслигата. Прв пат ќе играме против Германци, тоа ќе биде нов голем предизвик за нас како екипа, па ќе видиме како ќе изгледа тој дуел. Ние ќе се спремиме за нив, ќе ни биде потребно да играме во најдобро издание за да ја оствариме целта.