РК АЛКАЛОИД – ГРК ОХРИД 24-24 (11-13)
Сала: „Автокоманда“ во Скопје. Судии: Силвана Карбеска и Марија Илиева. Делегати: Марјан Начевски и Душко Камишевски

РК АЛКАЛОИД: Кизиќ 6 одб., Галевски 3 одб., Џонов, Тордарсон 4, Маркоски, Серафимов 3, Карасманакис 3, Стојковиќ 1, Ѓоргиев, Велковски 1, Ивановски 2, Костески 3, Петковски, Митев, Борзаш 6, Аларов 1
Седмерци: 2/4. Исклучувања: 6 мин.

ГРК ОХРИД: Чаневски 1 одб., Блажевски 10 одб., Ѓоргески, Стрмљан 1, Ојлески 2, Иванковиќ 4, Кукуловски, Вејин 3, Ристески, Тасески 1, Моралес, Савревски 2, Јотиќ 3, Љапис 1, Петриќ 2, Ѓукиќ 5.
Седмерци: 1/3. Исклучувања: 12 мин.

РК Алкалоид и ГРК Охрид го комплетираа првото коло од новата сезона во македонската Суперлига со дерби натпревар што се одигра во Автокоманда, а заврши без победник со конечни 24-24.

Мечот почна со брз ритам во кој двата тима обранаа големо внимание на транзицијата и особено на одбранбените задачи што го одведе натпреварот во ритам гол за гол. Гостинскиот состав го диктираше водството кое беше минимално и постојано израмнувано, но ракометарите на РК Алкалоид не успеваа да преминат во водство иако имаа неколку шанси да го сторат тоа.

Играта не се промени до крајот на првиот дел, тактички се надмудруваа двата тима, а по 30 минути гостинскиот состав замина во соблекувалната со предност од два гола (11-13). Паузата повеќе им годеше на играчите на Алкалоид, затоа што стартот на вториот дел, беше спротивен од финишот на првиот.

Со серија од шест гола, нашиот тим од 13-15, успеа да го сврти мечот во своја корист. Новото засилување Урош Борзаш диригираше во нападот, одбраната се зацврсти и десет минути не се прими гол, за позитива на нашиот тим од 19-15. Противникот веднаш реагираше и имаше мала пауза, по која постигна три гола во низа. Се врати на 19-18, но откако не реализира Охрид напад за реми, следеше одговор од Костески, за 20-18. Се играше драматично до крајот, а мечот заврши без победник. Голот за реми го постигна Валентин Карасманакис.

Екипата на РК Алкалоид не успеа до резултат и на реваншот (28-29) со германскиот бундеслигаш ТСВ Хановер-Бургдорф и така го заврши својот настап во квалификациите за ЕХФ Европската Лига. Германците беа подобри резултатски и на двата натпревари, со што го обезбедија своето место во групната фаза од натпреварувањето.

Кристијан Прокоп (РК Хановер-Бургдорф):
„Одигравме два интензивни натпревари против тимот на Алкалоид. Нашата цел беше да победиме на двата меча и тоа го остваривме. Среќен сум поради тоа бидејќи имаме млад тим кому му се потребни вакви натпревари надвор од Бундеслигата за да стекне искуство. Со нетрпение ја очекуваме групната фаза на Европската лига.“

Јустус Фишер (РК Хановер-Бургдорф):
„Одигравме два тешки и интензивни дуели против екипа со одлични поединци. Мислам дека одбраната беше клучна, нашите голмани беа извонредни и одбранија многу удари. На крај ја остваривме нашата главна цел – две победи во два меча.“

Кирил Лазаров (РК Алкалоид):
„Честитки за Хановер, заслужено победија. Јас сум разочаран бидејќи на двата меча промашивме вкупно девет удари од шест метри. Со таква статистика невозможно е да се совлада екипа што игра во Бундеслигата. Знаевме дека Хановер е поквалитетен тим, но ова е премногу. А кога ќе се земе предвид дека станува збор за противник кој победува екипи како Магдебург или Фуксе Берлин, тогаш јасно е колку беше тешко со таква статистика.“

Игор Ѓоргиев (РК Алкалоид):
„Сакам да им честитам на Хановер за победата и да им посакам среќа во групната фаза на ЕХФ Европската лига. За жал, за нас европската авантура завршува тука и нашиот фокус ќе биде насочен кон домашните натпреварувања.“

РК АЛКАЛОИД – ТСВ ХАНОВЕР БУРГДОРФ 28-29 (14-14)
Сала: „Автокоманда“ во Скопје. Судии: Михаил Пирву и Раду Потирниче од Романија. Делегат: Михаил Башев од Бугарија
РК АЛКАЛОИД: Кизиќ (3 одб), Галевски (13 одб), Џонов, Тордарсон 7, Серафимов, Карасманакис 1, Стојковиќ 2, Ѓоргиев 2, Велковски, Симоноски, Ивановски, Костески 5, Петковски, Митев 2, Борзаш 8, Аларов 1
Седмерци: 1/5 Исклучувања: 4 мин.
ТСВ ХАНОВЕР БУРГДОРФ: Бирлем (17 одб), Гаде, Тисие 2, Поулсен 7, Орлов 1, Стенхаузер 5, Михалчик 3, Ахо 1, Штуцке 1, Солстад, Фишер 8, Фајзе, Вебер, Родригез
Седмерци: 3/3 Исклучувања: 12 мин.

Германскиот ТСВ Хановер Бургдорф беше вкупен победник во двомечот, славеше со РК Алкалоид и во Скопје (28-29) и тие продолжуваат понатаму. Желни за докажување, ракометарите на РК Алкалоид одиграа борбен меч со динамика типична за Бундеслигата. Германците ја прифатија оваа игра и публиката имаше ретка шанса да ужива во брз ракомет со сите убавини и недостатоци што таквата игра ги носи.

Уште еднаш понесени од интервенциите на голманот Бирлем, ракометарите на ТСВ Хановер Бургдорф први ја преземаа иницијативата и поведоа со два гола разлика (4-2). Мечот добиваше ритам, но гостите одлично се снаоѓаа и имаа водство од 9-6, подоцна и од 12-6. Карактерот на ракометарите на РК Алкалоид беше на искушение и го положија испитот. Иван Галевски имаше одлично полувреме, рамнотежа беше воспоставена и конечно можевме во полн сјај да ги видиме момците во сино-бело кои во следните 15 минути анулираа предност од шест гола и на полувреме се замина со резултат 14-14.

Во второто полувреме РК Алкалоид прими три гола во серија, но бргу се врати во мечот со пет гола во мрежата на ривалот во низа, а во тој момент имаше позитива од 19-17. Резултатот оттогаш беше бркотница, двата тима константно беа близу, беше израмнето од 20-20, до 27-27, но нов промашен седмерец на Алкалоид, четврти на мечот, му дозволи на ривалот да си направи мала залиха во клучните минути во финишот, доволна за победа во Скопје.

Нашиот клуб вечерва го доби европскиот трофеј од Европскиот Куп на ЕХФ кој го освои со победа над АЕК Атина во финалето! Пехарот го додели г-дин Божидар Ѓурковиќ, претставник на ЕХФ. За нашиот клуб, ова е трет освоен трофеј во историјата, по Суперкупот и Купот на Македонија. До европското одличје, РК Алкалоид дојде со победи над Драгунас Клаипеда (Литванија), Вест Виена (Австрија), Бриксен (Италија), Баја Маре (Романија), Рунар Сандефјорд (Норвешка) и АЕК Атина (Грција).

Нашиот РК Алкалоид е во исчекување на реваншот против бундеслигашот РК Хановер-Бургдорф во рамки на квалификациите во Европската лига на ЕХФ. Првиот меч од битката за место во групната фаза заврши со победа бундеслигашот (37:27) и нашите играчи се пред мисија да се надополни тој минус, за место во групната фаза. Тренерот Кирил Лазаров го најави дуелот со германската екипа која во ланската сезона долго време беше лидер во најдобрата ракометна лига во светот.

„Ни следи реваншот во квалификациите за Европската лига со Хановер, за кого не треба да се трошат зборови. Повеќе од осум месеци беше лидер во најдобрата лига на светот, а оваа година е засилен со искусни играчи. Мене ми е жал што загубивме со нереални и неочекувани за мене десет гола разлика. Во сабота е убав ден, затоа што ќе го подигнеме европскиот пехар кој го освоивме лани со македонски тим, кој постои три години во Суперлигата и уште една во Првата лига и кој е базиран на македонски играчи. Не е убаво чувството со минус десет од Германија да дигаме пехар, но ќе се прилагодиме и ќе се обидеме да се израдуваме колку што можеме пред мечот, а на мечот достоинствено да го презентираме македонскиот ракомет. Сакам еден комплетен натпревар, им кажав на играчите дека мора сите да го оставиме срцето на терен заради нас, заради проектот, заради навивачите. Бев малку разочаран, имав непроспиени ноќи, но такви работи се случуваат во спортот. Штета што македонската јавност не можеше да го види на дело тоа како ние одигравме во Германија и дека не заслуживме пораз од десет гола. Хановер влегува во бундеслигашкиот ритам, на секое зошто имаат затоа и за нас ова ќе биде големо искуство. Се надевам дека ќе имаме комплетен натпревар, а како тоа ќе биде, ќе видиме по 60 минути. Колку и ние да се надевавме, се работи за еден супер-квалитетен противник“, изјави Лазаров.

Во име на тимот на РК Алкалоид пред реваншот со Хановер говореше и капитенот Игор Ѓоргиев. Средниот бек истакна дека тимот не размислува да се предаде и вети максимална борба и ангажираност за секоја топка.

„По дуелот во Германија со екипата на Хановер, сега ни следи домашен дуел пред нашата публика. На првиот меч екипно имавме лош ден пред се во нашата реализација, за чисти ситуации и пенали, што против една таква екипа е недозволиво. Негативата е голема, но ние нема да се откажеме во ниеден момент. Со помош на нашата публика ќе се бориме. Пред мечот го добиваме и пехарот во Европскиот куп, па затоа ја повикувам јавноста во сала, прво да се израдуваме на пехарот заедно, па потоа да бидат наш осми играч“, изјави Ѓорѓиев.

На прес-конференцијата говореше и кружниот напаѓач Валентин Карасманакис.

„Имавме екипно лош ден и технички грешки, сега ни следи реваншот. Се што ни останува е да дадеме 100 отсто од себе на терен и евентуално ако ни се даде шанса, да бидеме подобри од претходно и да го чекаме исходот. Ја повикувам публиката да ни даде поддршка“, изјави Карасманакис.

Натпреварот меѓу РК Алкалоид и РК Хановер-Бургдорф се игра во сабота со почеток од 19:30 часот во салата „Автокоманда“. На овој дуел ќе има и посебен момент за нашиот тим затоа што ќе го добие ланскиот освоен пехар во Европскиот Куп на ЕХФ кој го освои со победа над АЕК Атина во финалето

Судиската двојка на натпреварот доаѓа од Романија, тоа се Михаи Маријан Пирву и Раду Михаил Потирниче. Делегат на натпреварот е Михаил Башев од Бугарија. Победникот од овој двомеч ќе игра во Групата Г од Европската лига на ЕХФ каде чекаат екипите на Фредериција (Данска), Татран Прешов (Словачка) и Савехоф/Малме (Шведска).

Екипата на РК Алкалоид започна со европските настапи во квалификациите за Европската лига на ЕХФ и не успеа да дојде до позитивен резултат на гостувањето кај РК Хановер-Бургдорф (37-27) во првиот меч од квалификацискиот двомеч. Реваншот меѓу двата тима ќе се игра за седум дена во салата „Автокоманда“, а подобриот ќе патува во групната фаза.

Натпреварот тргна во брз ритам, без разлика дали беа акции од транзиција или пак беа позициски напади. Домашните први преземаа контрола благодарение на одбранет седмерец и една техничка грешка на Алкалоид и поведоа со два гола разлика. Алкалоид се врати во егал по осум минути игра (6-6), а Тордарсон беше играчот кој непогрешливо стрелаше кон голот на Жоел Бирлем. Алкалоид за првпат и поведе во десеттата минута (10-9), а Исланѓанецот имаше 5/5, но дојде и период на промашени шутеви и грешки и тоа ги врати домашните во егал, а во 15 минута успеаја да поведат и со 14-11 по што Кирил Лазаров побара тајм-аут. Голманот Бирлем успеа да скроти уште еден зицер, а тоа им продуцираше контра напад за 16-12. Алкалоид брзо намали преку Борзаш, потоа следеа две одбрани на Галевски, но не ги искористи Алкалоид за да намали затоа што и Бирлем одбрани двапати по ред.

На полувремето, Хановер ја задржа позитивата, на пауза замина со 19-15. Почетокот на вториот дел претежно беше гол за гол, двата тима погодуваа се до 24-19, а во тие моменти Алкалоид остана со играч помалку затоа што Велковски доби црвен картон и противникот тоа го искористи. Највисоката позитива која бундеслигашот ја имаше пред својата публика беше плус од десет гола. Најголемиот проблем на РК Алкалоид на овој меч беше реализацијата, а за тоа говори податокот дека голманите на ривалите собраа 19 одбрани.